24.07.2025

Ўзбекистон Республикаси Президенти Шавкат Мирзиёев Озарбайжон Республикаси Президенти Илҳом Алиев билан телефон орқали мулоқот қилди.

Озарбайжон етакчиси давлатимиз раҳбарини таваллуд куни билан самимий муборакбод этиб, унга мустаҳкам соғлик, бахт-саодат, Ўзбекистоннинг барқарор тараққиёти ва равнақи йўлидаги давлатчилик фаолиятида янги муваффақиятлар тилади.

Ўзбекистон Президентининг шу ой бошида Озарбайжонга амалга оширган тарихий давлат ташрифининг самарали натижалари катта мамнуният билан қайд этилди.

Етакчиларнинг бўлиб ўтган учрашувлари ва Олий давлатлараро кенгашнинг иккинчи йиғилиши якунида эришилган келишувларнинг амалга оширилиши Ўзбекистон-Озарбайжон иттифоқчилик муносабатларини янада мустаҳкамлаш ва кўп қиррали ҳамкорликни кенгайтиришга хизмат қилиши таъкидланди.

Товар айирбошлаш ҳажми йил бошидан буён 30 фоизга ошди. Саноат зонаси ва логистика компаниясини ташкил этишни ўз ичига олган истиқболли кооперация лойиҳалари портфелини шакллантириш устида иш олиб борилмоқда. Нефть-газ соҳасидаги стратегик лойиҳа бўйича Маҳсулот тақсимотига оид битим имзоланди.

Ўзбекистон ва Озарбайжон ўртасида дипломатик муносабатлар ўрнатилганининг 30 йиллигини нишонлаш доирасида йирик қўшма тадбирларга тайёргарлик кўрилмоқда.

• 
• 
•