28.08.2017

O‘zbekiston Respublikasi Prezidenti, Qurolli Kuchlar Oliy Bosh Qo‘mondoni Shavkat Mirziyoyev Samarqandga safarining ikkinchi kunida “Kattaqo‘rg‘on” dala o‘quv maydoniga tashrif buyurib, Janubi-g‘arbiy maxsus harbiy okrug qo‘shinlarining tezkor taktik o‘quv mashg‘ulotlarini kuzatdi. Bu yerda bo‘linmalarning jangovar tayyorgarlik rejasiga muvofiq hamkorlikda o‘zaro taktik harakatini takomillashtirish, harbiy xizmatchilarning murakkab vaziyatlarda nostandart qarorlar qabul qilish kabi maqsadlarga qaratilgan operativ-taktik mashqlari o‘tkazildi.

Dastlab, mazkur dala o‘quv maydonida qo‘shinlar tomonidan dushman tahdidini qaytarish va uni yo‘q qilishga doir bir-biriga bog‘liq bo‘lgan jami jangovar harakatlar, epizodlar namoyish etildi. Mazkur o‘quv mashqlarini rejalashtirishda bugungi zamon jangining muhim xususiyatlari o‘rganildi, qo‘llaniladigan eng maqbul qurol-yarog‘ va harbiy texnika vositalari belgilandi, muhimi harbiy xizmatchilar ma’naviy-ruhiy jihatdan tayyorlandi.

Shavkat Mirziyoyev shundan so‘ng, dala o‘quv maydonidagi sharoitlar bilan tanishib, o‘quv-taktik mashqi ishtirokchilari bilan suhbatlashdi. Muloqot asosini xarbiy xizmatchilar uchun yanada qulay sharoitlar yaratish, ularning moddiy ta’minotini mustahkamlash, dars jarayonlarini yangicha usulda olib borish, o‘quv dasturlarini yaratish kabi dolzarb mavzular tashkil etdi. Shuningdek, harbiylarning yuksak ma’naviyatli bo‘lishlari uchun yurtimizning ijodkorlari, adabiyotshunos olimlar va shoirlar bilan adabiy kechalar, turli uchrashuvlar tashkil etish kerakligi qayd etildi. Chindan ham bugun harbiylik kasbi yoshlar uchun xavas, matonat maktabidir. Shundan so‘ng, Shavkat Mirziyoyev Mudofaa vazirligi qo‘shinlarida qo‘llanib kelinayotgan harbiy texnika va qurol-yarog‘lar, ya’ni zirxli texnikalar, artilleriya vositalari, motoo‘qchi bo‘linmalaridagi avtomobillar, razvedka va aloqa vositalari bilan yaqindan tanishdi.

 

• 
• 
•