05.12.2016
O‘zbekiston Respublikasining saylangan Prezidenti Shavkat Mirziyoyev bilan Rossiya Federatsiyasi Prezidenti Vladimir Putin o‘rtasida Rossiya tomonining tashabbusi bilan 2016-yil 5-dekabr kuni telefon orqali muloqot bo‘lib o‘tdi.
Rossiya Federatsiyasi Prezidenti Shavkat Mirziyoyevni O‘zbekiston Respublikasi Prezidenti saylovida g‘alaba qozongani bilan samimiy tabrikladi.
Davlat rahbarlari hozirgi kunda ko‘p qirrali O‘zbekiston – Rossiya munosabatlari yuksak darajada ekanini mamnuniyat bilan ta’kidlab, Samarqand shahrida o‘tgan oliy darajadagi uchrashuv chog‘ida erishilgan kelishuvlar rejali va tizimli asosda hayotga tatbiq etilayotganini ijobiy baholadilar.
Tomonlar turli vazirlik va idoralar, xo‘jalik subyektlari va boshqa tashkilotlar o‘rtasidagi o‘zaro samarali hamkorlik amaliy natijalar berayotganini alohida qayd etdilar.
O‘zbekiston va Rossiya rahbarlari strategik sheriklik va ittifoqchilik munosabatlarini izchil davom ettirish va yanada rivojlantirish, o‘zaro aloqalarga doir barcha sohalarda, shuningdek, dolzarb mintaqaviy va xalqaro masalalar bo‘yicha davlatlararo ishonchli, ochiq va konstruktiv muloqotni chuqurlashtirishga qat’iy tayyor ekanliklarini bildirdilar.
Suhbat samimiy va do‘stona ruhda o‘tdi.
Ma'lumotlardan foydalanilganda
www.president.uz ga havola ko‘rsatilishi shart
© 2025 O‘zbekiston Respublikasi Prezidentining rasmiy veb-sayti
Barcha huquqlar himoyalangan
Diqqat! Agar siz matnda xatoliklarni aniqlasangiz, ularni belgilab, ma`muriyatni xabardor qilish uchun Ctrl+Enter tugmalarini bosing
