04.08.2017

O‘zbekiston Respublikasi Prezidentining farmoyishi, № F-5009, 4 avgust 2017 yil

Yoshlarning ijodiy faolligini qo‘llab-quvvatlash uchun zamonaviy talablarga javob beradigan qulay shart-sharoitlar yaratish hamda mazkur masalalarga yo‘naltirilgan mablag‘lardan samarali foydalanish maqsadida:

1. O‘zbekiston yoshlar ittifoqi Markaziy Kengashining Toshkent shahar “Yoshlar ijod saroyi” nodavlat notijorat tashkilotining Yoshlar simfonik orkestri (keyingi o‘rinlarda Yoshlar simfonik orkestri deb yuritiladi) uchun ilovaga muvofiq tovarlarni xarid qilish to‘g‘risidagi taklifi ma’qullansin.

Bunda, mazkur farmoyishning ilovasida ko‘rsatilgan tovarlar O‘zbekiston yoshlar ittifoqining mablag‘lari hisobidan “O‘zsanoateksport” aksiyadorlik jamiyati orqali xorijdan xarid qilinishi inobatga olinsin.

2. Yoshlar simfonik orkestri uchun “O‘zsanoateksport” aksiyadorlik jamiyati tomonidan mazkur farmoyishning ilovasiga muvofiq xorijdan olib kelinadigan tovarlar 2018 yil 31 dekabrgacha bojxona to‘lovlaridan (bojxona yig‘imlari bundan mustasno) ozod qilinsin.

3. O‘zbekiston Respublikasi Markaziy banki vakolatli bank bilan birgalikda mazkur farmoyishning ilovasida ko‘rsatilgan tovarlarni xorijdan xarid qilish uchun mablag‘larning belgilangan tartibda konvertatsiya qilinishini ta’minlasin.

4. O‘zbekiston Respublikasi Davlat soliq qo‘mitasi Davlat bojxona qo‘mitasi bilan birgalikda mazkur farmoyishning ilovasida ko‘rsatilgan ro‘yxat bo‘yicha xorijdan olib kelinadigan tovarlardan maqsadli foydalanilishi ustidan qat’iy nazorat o‘rnatsin.

Belgilansinki, ilovaga muvofiq ro‘yxat bo‘yicha olib kelinadigan tovarlar maqsadsiz foydalanilgan taqdirda bojxona to‘lovlari bo‘yicha imtiyozlar berilishi munosabati bilan to‘lanmagan bojxona to‘lovlari summasi qonunchilikda belgilangan moliyaviy sanksiyalarni qo‘llagan holda O‘zbekiston Respublikasi Davlat byudjetiga undiriladi.

5. Mazkur farmoyishning ijrosini nazorat qilish O‘zbekiston Respublikasining Bosh vaziri A.N.Aripov va O‘zbekiston Respublikasi Prezidentining Davlat maslahatchisi Q.K.Kuranbayev zimmasiga yuklansin.

O‘zbekiston Respublikasi
          Prezidenti                                           Sh.Mirziyoyev

 

• 
• 
•