29.08.2025

Toshkentdagi “Yangi O‘zbekiston” bog‘ida Mustaqillik kuni munosabati bilan bayram tantanasi bo‘lib o‘tdi.

Prezident Shavkat Mirziyoyev butun xalqimizni, xorijdagi vatandoshlarimizni davlatimiz mustaqilligining 34 yillik shonli sanasi bilan tabrikladi.

– Bugun, mana shu ulug‘ ayyom kunlarida hammamiz bir hayotiy haqiqatni chuqur his etmoqdamiz. Yangi O‘zbekiston g‘oyasi asosida boshlagan ulkan islohotlarimiz tufayli mustaqillik bergan huquq va erkinliklarni har bir yurtdoshimiz o‘z hayotida chuqur his qilib, bu imkoniyatlardan keng foydalanmoqda. Aynan ana shu ulug‘vor g‘oya asosida biz uch ming yillik boy tarix va madaniyatimizni qaytadan idrok etdik. Yurtimiz zaminidagi Birinchi va Ikkinchi Renessans an’analarini rivojlantirib, Uchinchi Renessans sari dadil amaliy qadamlar qo‘ymoqdamiz.

Ishonchim komil, bu yo‘lda Yangi O‘zbekiston davlati, Yangi O‘zbekiston jamiyati buyuk tariximizni yangi – yanada yuksak Uyg‘onish davri bilan bog‘laydigan mustahkam ko‘prik bo‘lib xizmat qiladi, – dedi davlatimiz rahbari.

Mustaqillik, avvalo, kuchli iqtisodiyot bilan mustahkam. Shu ma’noda, Prezidentimizning nutqida ko‘plab muhim natijalar aytib o‘tildi.

Dunyodagi murakkab vaziyatga qaramasdan, mamlakatimiz iqtisodiyoti 6 foizdan yuqori sur’atlarda barqaror o‘smoqda. Keyingi sakkiz yilda yalpi ichki mahsulot 2 karra oshib, o‘tgan yili 115 milliard dollarga, eksport hajmi 26 milliard dollarga yetgan. Yil yakuni bilan yalpi ichki mahsulotimiz 130 milliard dollar bo‘lishi kutilmoqda. Davlatimizning oltin-valyuta zaxiralari ilk bor 48 milliard dollardan oshgan. So‘nggi sakkiz yilda yurtimizga qariyb 130 milliard dollar xorijiy investitsiyalar kirib kelgan.

Xalqimizning ko‘z o‘ngida minglab zamonaviy korxonalar, ijtimoiy-iqtisodiy infratuzilma obyektlari qad rostlamoqda. Bu yil jami 35 milliard dollar investitsiya evaziga 9 mingga yaqin yangi korxona, xizmat ko‘rsatish majmualari barpo etiladi.

O‘tgan davrda birgina kichik va o‘rta tadbirkorlar soni 2 karra ko‘paygan. Bugun ushbu tarmoqda 10 milliondan ortiq aholi mehnat qilib, daromad topmoqda.

Yil boshidan beri 5 million aholining bandligi ta’minlandi. Shu yilning o‘zida chetda ishlayotgan 700 ming fuqaro yurtimizga, o‘z oilasi bag‘riga qaytdi.

O‘zbekiston dunyoga keng ochilgani natijasida xorijiy sayyohlar soni o‘tgan yili 10 million kishidan, turizm xizmatlari eksporti esa 3 milliard dollardan oshdi.

Iqtisodiyot rivojlanishi, aholi ko‘payishi bilan xavfsiz va barqaror energiya resurslariga talab ortyapti. Shuning uchun “yashil” energiya ulushini oshirish bo‘yicha misli ko‘rilmagan qadamlar qo‘yildi.

Natijada elektr ishlab chiqarish quvvatlari 2016-yildagi 59 milliard kilovatt-soatdan 85 milliard kilovatt-soatga yetdi, kelasi yilda bu 97 milliard kilovatt-soatdan ziyodni tashkil etadi.

Shu yilning o‘zida 6,5 milliard kilovatt-soat “yashil” energiya ishlab chiqarildi. Eng muhimi, jami generatsiya quvvatlarida “yashil” energiya ulushi 30 foizga yetdi. 2030 yilgacha yana 35 milliard dollar to‘g‘ridan to‘g‘ri investitsiya hisobidan “yashil” energiya ulushini 54 foizga olib chiqish rejalashtirilgan.

Ijtimoiy sohalar ham rivojlantirilib, aholining turmush sharoitlari yaxshilanmoqda. Keyingi sakkiz yilda yurtimizda qariyb 12 mingta ko‘p qavatli uy-joy barpo etildi. Joriy yil “Yangi O‘zbekiston” va boshqa massivlarda yana 130 ming xonadonli zamonaviy uy-joylar qurilib, aholiga topshiriladi.

Ijtimoiy himoya siyosati ehtiyojmand insonlarga madad bo‘lmoqda. “Hamrohlik dasturi”ga muvofiq, ota-ona mehridan mahrum bo‘lgan 11 ming nafar bolani ta’lim, kasb-hunar, sport tizimiga qamrab olingani muhim natija bo‘ldi. Ehtiyojmand oilalarning 2,5 milliondan ziyod a’zolariga 110 turdagi yordam va xizmatlar ko‘rsatish yo‘lga qo‘yildi.

Bularning barchasi o‘z samarasini berib, yurtimizda kambag‘allik darajasi 6,8 foizga tushdi.

Sifatli ta’lim va aholi salomatligi – kelgusi taraqqiyotni hal qiluvchi eng muhim masala. Shu maqsadda so‘nggi sakkiz yilda xususiy sektor bilan birga bog‘chalardagi o‘rinlar soni 2,5 milliontaga, qamrovi esa 78 foizga yetkazildi. Maktablarda qo‘shimcha 1 millionta o‘quvchi o‘rni yaratildi. Oliy ta’limda qamrov 9 foizdan 42 foizga oshdi.

So‘nggi yillarda tibbiyot uchun ajratilayotgan mablag‘lar 6 karra oshirildi, sifatli tibbiy xizmatlar mahallagacha tushirildi. Yuqori texnologik amaliyotlarning 400 dan ortig‘i viloyat va tumanlarning o‘zida bajarilmoqda. Aholining turmush sharoitlari yaxshilanib borayotgani natijasida o‘rtacha umr ko‘rish darajasi 73,8 yoshdan 75,1 yoshga uzaygani qayd etildi.

Mamlakatimiz o‘g‘il-qizlari sanoat, ilm-fan, madaniyat va sportda katta yutuqlarga erishayotgani ta’kidlandi. Ularni e’tirof etib, Prezidentimiz butun O‘zbekiston yoshlariga qarata shunday dedi:

“Aziz farzandlarim, doimo yodda tuting: baxt – intilganniki, g‘alaba – kurashganniki! Kelajakni mardlar, tarixni g‘oliblar yaratadi. Hamisha oldinga qarab intiling, bahodir o‘g‘lonlarim, oqila qizlarim! Sizlarning ezgu ishlaringizda Vatan, xalq, Prezident barchangizga hamisha tayanch va suyanch bo‘ladi!”.

Davlatimiz rahbari o‘z nutqida geosiyosiy vaziyatga ham to‘xtaldi. O‘zbekistonning ovozi mintaqaviy va xalqaro maydonda tobora baland yangrayotgani, yurtimizda ko‘plab nufuzli sammitlar o‘tayotgani ta’kidlandi. Shu o‘rinda O‘zbekistonning tashqi siyosat borasidagi pozitsiyasi yana bir bor qayd etib o‘tildi.

Prezidentimiz bayramda qatnashayotgan xorijiy davlatlarning elchilarini, xalqaro tashkilotlar vakillarini samimiy qutlab, samarali hamkorlik uchun tashakkur izhor qildi.

So‘zining yakunida Shavkat Mirziyoyev yurtimizdagi o‘zgarishlar davom ettirilishini ta’kidlab, xalqimizni birlik va fidoyilikka da’vat etdi.

– Biz barchamiz bitta xalq, bitta mamlakat, bitta oilamiz! Hammamizning taqdirimiz, kelajagimiz, baxtimiz va yutug‘imiz ham yagona va mushtarak. Har bir yurtdoshimiz hayotning o‘zi oldimizga qo‘yayotgan o‘tkir talablarni chuqur anglab, jonajon Vatanimiz ravnaqi yo‘lida sidqidildan xizmat qiladi deb ishonaman, – dedi Prezident.

Shundan so‘ng bayram shodiyonasi katta konsert dasturi bilan davom etdi. Kuy-qo‘shiqlarda xalqimizning boy san’ati va qadriyatlari, bugungi shukronalik hissi va kelgusi orzu-intilishlari namoyon bo‘ldi. Tantana televideniye va internet orqali to‘g‘ridan to‘g‘ri namoyish etilib, bayram shukuhini barcha hududlarga yetkazdi.