29.08.2025

Тошкентдаги “Янги Ўзбекистон” боғида Мустақиллик куни муносабати билан байрам тантанаси бўлиб ўтди.

Президент Шавкат Мирзиёев бутун халқимизни, хориждаги ватандошларимизни давлатимиз мустақиллигининг 34 йиллик шонли санаси билан табриклади.

– Бугун, мана шу улуғ айём кунларида ҳаммамиз бир ҳаётий ҳақиқатни чуқур ҳис этмоқдамиз. Янги Ўзбекистон ғояси асосида бошлаган улкан ислоҳотларимиз туфайли мустақиллик берган ҳуқуқ ва эркинликларни ҳар бир юртдошимиз ўз ҳаётида чуқур ҳис қилиб, бу имкониятлардан кенг фойдаланмоқда. Айнан ана шу улуғвор ғоя асосида биз уч минг йиллик бой тарих ва маданиятимизни қайтадан идрок этдик. Юртимиз заминидаги Биринчи ва Иккинчи Ренессанс анъаналарини ривожлантириб, Учинчи Ренессанс сари дадил амалий қадамлар қўймоқдамиз.

Ишончим комил, бу йўлда Янги Ўзбекистон давлати, Янги Ўзбекистон жамияти буюк тарихимизни янги – янада юксак Уйғониш даври билан боғлайдиган мустаҳкам кўприк бўлиб хизмат қилади, – деди давлатимиз раҳбари.

Мустақиллик, аввало, кучли иқтисодиёт билан мустаҳкам. Шу маънода, Президентимизнинг нутқида кўплаб муҳим натижалар айтиб ўтилди.

Дунёдаги мураккаб вазиятга қарамасдан, мамлакатимиз иқтисодиёти 6 фоиздан юқори суръатларда барқарор ўсмоқда. Кейинги саккиз йилда ялпи ички маҳсулот 2 карра ошиб, ўтган йили 115 миллиард долларга, экспорт ҳажми 26 миллиард долларга етган. Йил якуни билан ялпи ички маҳсулотимиз 130 миллиард доллар бўлиши кутилмоқда. Давлатимизнинг олтин-валюта захиралари илк бор 48 миллиард доллардан ошган. Сўнгги саккиз йилда юртимизга қарийб 130 миллиард доллар хорижий инвестициялар кириб келган.

Халқимизнинг кўз ўнгида минглаб замонавий корхоналар, ижтимоий-иқтисодий инфратузилма объектлари қад ростламоқда. Бу йил жами 35 миллиард доллар инвестиция эвазига 9 мингга яқин янги корхона, хизмат кўрсатиш мажмуалари барпо этилади.

Ўтган даврда биргина кичик ва ўрта тадбиркорлар сони 2 карра кўпайган. Бугун ушбу тармоқда 10 миллиондан ортиқ аҳоли меҳнат қилиб, даромад топмоқда.

Йил бошидан бери 5 миллион аҳолининг бандлиги таъминланди. Шу йилнинг ўзида четда ишлаётган 700 минг фуқаро юртимизга, ўз оиласи бағрига қайтди.

Ўзбекистон дунёга кенг очилгани натижасида хорижий сайёҳлар сони ўтган йили 10 миллион кишидан, туризм хизматлари экспорти эса 3 миллиард доллардан ошди.

Иқтисодиёт ривожланиши, аҳоли кўпайиши билан хавфсиз ва барқарор энергия ресурсларига талаб ортяпти. Шунинг учун “яшил” энергия улушини ошириш бўйича мисли кўрилмаган қадамлар қўйилди.

Натижада электр ишлаб чиқариш қувватлари 2016 йилдаги 59 миллиард киловатт-соатдан 85 миллиард киловатт-соатга етди, келаси йилда бу 97 миллиард киловатт-соатдан зиёдни ташкил этади.

Шу йилнинг ўзида 6,5 миллиард киловатт-соат “яшил” энергия ишлаб чиқарилди. Энг муҳими, жами генерация қувватларида “яшил” энергия улуши 30 фоизга етди. 2030 йилгача яна 35 миллиард доллар тўғридан-тўғри инвестиция ҳисобидан “яшил” энергия улушини 54 фоизга олиб чиқиш режалаштирилган.

Ижтимоий соҳалар ҳам ривожлантирилиб, аҳолининг турмуш шароитлари яхшиланмоқда. Кейинги саккиз йилда юртимизда қарийб 12 мингта кўп қаватли уй-жой барпо этилди. Жорий йил “Янги Ўзбекистон” ва бошқа массивларда яна 130 минг хонадонли замонавий уй-жойлар қурилиб, аҳолига топширилади.

Ижтимоий ҳимоя сиёсати эҳтиёжманд инсонларга мадад бўлмоқда. “Ҳамроҳлик дастури”га мувофиқ, ота-она меҳридан маҳрум бўлган 11 минг нафар болани таълим, касб-ҳунар, спорт тизимига қамраб олингани муҳим натижа бўлди. Эҳтиёжманд оилаларнинг 2,5 миллиондан зиёд аъзоларига 110 турдаги ёрдам ва хизматлар кўрсатиш йўлга қўйилди.

Буларнинг барчаси ўз самарасини бериб, юртимизда камбағаллик даражаси 6,8 фоизга тушди.

Сифатли таълим ва аҳоли саломатлиги – келгуси тараққиётни ҳал қилувчи энг муҳим масала. Шу мақсадда сўнгги саккиз йилда хусусий сектор билан бирга боғчалардаги ўринлар сони 2,5 миллионтага, қамрови эса 78 фоизга етказилди. Мактабларда қўшимча 1 миллионта ўқувчи ўрни яратилди. Олий таълимда қамров 9 фоиздан 42 фоизга ошди.

Сўнгги йилларда тиббиёт учун ажратилаётган маблағлар 6 карра оширилди, сифатли тиббий хизматлар маҳаллагача туширилди. Юқори технологик амалиётларнинг 400 дан ортиғи вилоят ва туманларнинг ўзида бажарилмоқда. Аҳолининг турмуш шароитлари яхшиланиб бораётгани натижасида ўртача умр кўриш даражаси 73,8 ёшдан 75,1 ёшга узайгани қайд этилди.

Мамлакатимиз ўғил-қизлари саноат, илм-фан, маданият ва спортда катта ютуқларга эришаётгани таъкидланди. Уларни эътироф этиб, Президентимиз бутун Ўзбекистон ёшларига қарата шундай деди:

“Азиз фарзандларим, доимо ёдда тутинг: бахт – интилганники, ғалаба – курашганники! Келажакни мардлар, тарихни ғолиблар яратади. Ҳамиша олдинга қараб интилинг, баҳодир ўғлонларим, оқила қизларим! Сизларнинг эзгу ишларингизда Ватан, халқ, Президент барчангизга ҳамиша таянч ва суянч бўлади!”.

Давлатимиз раҳбари ўз нутқида геосиёсий вазиятга ҳам тўхталди. Ўзбекистоннинг овози минтақавий ва халқаро майдонда тобора баланд янграётгани, юртимизда кўплаб нуфузли саммитлар ўтаётгани таъкидланди. Шу ўринда Ўзбекистоннинг ташқи сиёсат борасидаги позицияси яна бир бор қайд этиб ўтилди.

Президентимиз байрамда қатнашаётган хорижий давлатларнинг элчиларини, халқаро ташкилотлар вакилларини самимий қутлаб, самарали ҳамкорлик учун ташаккур изҳор қилди.

Сўзининг якунида Шавкат Мирзиёев юртимиздаги ўзгаришлар давом эттирилишини таъкидлаб, халқимизни бирлик ва фидойиликка даъват этди.

– Биз барчамиз битта халқ, битта мамлакат, битта оиламиз! Ҳаммамизнинг тақдиримиз, келажагимиз, бахтимиз ва ютуғимиз ҳам ягона ва муштарак. Ҳар бир юртдошимиз ҳаётнинг ўзи олдимизга қўяётган ўткир талабларни чуқур англаб, жонажон Ватанимиз равнақи йўлида сидқидилдан хизмат қилади деб ишонаман, – деди Президент.

Шундан сўнг байрам шодиёнаси катта концерт дастури билан давом этди. Куй-қўшиқларда халқимизнинг бой санъати ва қадриятлари, бугунги шукроналик ҳисси ва келгуси орзу-интилишлари намоён бўлди. Тантана телевидение ва интернет орқали тўғридан-тўғри намойиш этилиб, байрам шукуҳини барча ҳудудларга етказди.