24.07.2025

O‘zbekiston Respublikasi Prezidenti Shavkat Mirziyoyev 24-iyul kuni Belarus Respublikasi Prezidenti Aleksandr Lukashenko bilan telefon orqali muloqot qildi.

Suhbat avvalida Belarus yetakchisi davlatimiz rahbarini tavallud kuni bilan samimiy tabriklab, mustahkam sog‘lik, baxt-saodat hamda O‘zbekistonning ravnaqi va farovonligi yo‘lida yangi zafarlar tiladi.

Belarus Prezidentining o‘tgan yil fevral oyidagi O‘zbekistonga tashrifi davomida erishilgan kelishuvlarni qabul qilingan "yo‘l xaritasi" asosida amalga oshirish masalalari ko‘rib chiqildi.

Turli darajalardagi faol va sermahsul muloqotlar, shu jumladan yaqinda Minsk shahrida o‘tgan Hukumatlararo komissiyaning navbatdagi yig‘ilishi va Toshkent shahrida o‘tgan tashqi ishlar vazirlari uchrashuvining samarali natijalari mamnuniyat bilan qayd etildi.

Joriy yil boshidan tovar ayirboshlash 28 foizga oshdi. Qishloq xo‘jaligi, elektrotexnika, to‘qimachilik, farmatsevtika va boshqa tarmoqlarda qo‘shma kooperatsiya loyihalari amalga oshirilmoqda. Birgalikda madaniy-gumanitar tadbirlar o‘tkazilmoqda.

O‘zbekiston va Belarus yetakchilari bo‘lajak ikki tomonlama tadbirlar rejasini ham muhokama qildilar.

• 
• 
•