24.07.2025

Ўзбекистон Республикаси Президенти Шавкат Мирзиёев 24 июль куни Беларусь Республикаси Президенти Александр Лукашенко билан телефон орқали мулоқот қилди.

Суҳбат аввалида Беларусь етакчиси давлатимиз раҳбарини таваллуд куни билан самимий табриклаб, мустаҳкам соғлик, бахт-саодат ҳамда Ўзбекистоннинг равнақи ва фаровонлиги йўлида янги зафарлар тилади.

Беларусь Президентининг ўтган йил февраль ойидаги Ўзбекистонга ташрифи давомида эришилган келишувларни қабул қилинган "йўл харитаси" асосида амалга ошириш масалалари кўриб чиқилди.

Турли даражалардаги фаол ва сермаҳсул мулоқотлар, шу жумладан яқинда Минск шаҳрида ўтган Ҳукуматлараро комиссиянинг навбатдаги йиғилиши ва Тошкент шаҳрида ўтган ташқи ишлар вазирлари учрашувининг самарали натижалари мамнуният билан қайд этилди.

Жорий йил бошидан товар айирбошлаш 28 фоизга ошди. Қишлоқ хўжалиги, электротехника, тўқимачилик, фармацевтика ва бошқа тармоқларда қўшма кооперация лойиҳалари амалга оширилмоқда. Биргаликда маданий-гуманитар тадбирлар ўтказилмоқда.

Ўзбекистон ва Беларусь етакчилари бўлажак икки томонлама тадбирлар режасини ҳам муҳокама қилдилар.

• 
• 
•