01.03.2022

O‘zbekiston Respublikasi Prezidentining qarori

O‘zbekiston Respublikasi Prezidentining 2022-yil 1-martdagi “Oila va xotin-qizlar bilan ishlash, mahalla va nuroniylarni qo‘llab-quvvatlash tizimini takomillashtirish chora-tadbirlari to‘g‘risida”gi PF-81-son Farmoniga muvofiq:

1. Oliy Majlis palatalari, Vazirlar Mahkamasi hamda mahalliy vakillik organlarining Xotin-qizlarning jamiyatdagi rolini oshirish, gender tenglik va oila masalalari bo‘yicha respublika komissiyasini, mahalliy xalq deputatlari Kengashlarida esa Xotin-qizlarning jamiyatdagi rolini oshirish, gender tenglik va oila masalalari bo‘yicha hududiy komissiyalarni tashkil etish haqidagi taklifi qo‘llab-quvvatlansin.

2. Quyidagilar:

a) Oila va xotin-qizlar davlat qo‘mitasining tashkiliy tuzilmasi 1-ilovaga muvofiq;

b) Davlat budjetidan moliyalashtiriladigan boshqaruv xodimlarining umumiy cheklangan soni:

49 nafar shtat birligidan iborat markaziy apparatining tuzilmasi 2-ilovaga muvofiq;

168 nafar shtat birligidan iborat Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar oila va xotin-qizlar boshqarmalarining namunaviy tuzilmasi 3-ilovaga muvofiq;

621 nafar shtat birligidan iborat tuman (shahar) oila va xotin-qizlar bo‘limlarining namunaviy tuzilmasi 4-ilovaga muvofiq tasdiqlansin.

3. Bosh vazir o‘rinbosari — Oila va xotin-qizlar davlat qo‘mitasi raisiga:

o‘zining o‘rinbosarlari o‘rtasida aniq vazifalar va funksiyalarni taqsimlash;

Oila va xotin-qizlar davlat qo‘mitasining (keyingi o‘rinlarda — Qo‘mita) markaziy apparati, hududiy bo‘linmalari tuzilmalariga boshqaruv xodimlarining belgilangan umumiy shtatlar soni va mehnatga haq to‘lash fondi doirasida o‘zgartirishlar kiritish;

davlat organlari va boshqa tashkilotlar, yetakchi loyiha institutlari, ilmiy va ta’lim muassasalari, xalqaro tashkilotlar, xorijiy kompaniyalarning yuqori malakali mutaxassislarini, shuningdek, ekspertlarni maslahatchi sifatida jalb qilish huquqi berilsin.

4. Vazirlar Mahkamasi ijro etuvchi tuzilmasida xodimlarning umumiy cheklangan soni doirasida 5 nafar boshqaruv xodimlari shtat birligidan iborat bo‘lgan Bosh vazir o‘rinbosari — Oila va xotin-qizlar davlat qo‘mitasi raisining kotibiyati tashkil etilsin.

5. Belgilab qo‘yilsinki:

Bosh vazir o‘rinbosari — Oila va xotin-qizlar davlat qo‘mitasi raisi har yili Xotin-qizlarning jamiyatdagi rolini oshirish, gender tenglik va oila masalalari bo‘yicha respublika komissiyasiga Qo‘mita faoliyati yuzasidan hamda sohadagi tizimli muammolar va ularning yechimi to‘g‘risida axborot berib boradi;

mahallalardagi xotin-qizlar faollari lavozimlariga nomzodlar tuman (shahar) hokimlari o‘rinbosarlari — oila va xotin-qizlar bo‘limlari boshliqlari boshchiligidagi tanlov komissiyalarini shakllantirish orqali ochiq tanlovlar asosida ishga qabul qilinadi;

mahallalardagi xotin-qizlar faollari lavozimlariga oila va xotin-qizlar bilan ishlash tajribasiga ega, shaxsiy fazilatlari bilan namuna ko‘rsatgan, fidoyi va sadoqatli nomzodlar tayinlanadi;

Qo‘mita markaziy apparati xodimlari mehnatga haq to‘lash shartlariga ko‘ra Mahalla va nuroniylarni qo‘llab-quvvatlash vazirligi markaziy apparati xodimlariga, uning hududiy bo‘linmalari xodimlari Mahalla va nuroniylarni qo‘llab-quvvatlash vazirligining hududiy bo‘linmalari xodimlariga tenglashtiriladi.

6. Qo‘mita va uning hududiy bo‘linmalarining faoliyatini moliyalashtirish manbalari etib quyidagilar belgilansin:

Davlat budjeti mablag‘lari;

Qo‘mitaning budjetdan tashqari mablag‘lari;

qonunchilik hujjatlarida taqiqlanmagan boshqa manbalar.

7. Vazirlar Mahkamasi ikki oy muddatda Oila va xotin-qizlar davlat qo‘mitasi to‘g‘risidagi nizomni tasdiqlasin.

8. Bosh prokuraturaning tashkiliy-shtat tuzilmasida shtat birliklarini maqbullashtirish hisobidan 20 nafar shtat birligidan (shundan, 14 nafar hududiy vakillar shtat birligi) iborat Xotin-qizlar huquqlarini ta’minlash hamda ularni tazyiq va zo‘ravonlikdan himoya qilish sohalarida qonunchilik ijrosi ustidan nazorat boshqarmasi tashkil etilsin.

Bosh prokuratura xotin-qizlar huquqlarini hamda tazyiq va zo‘ravonlikdan himoya qilish sohalaridagi qonunchilik hujjatlari ijrosi ustidan tizimli nazorat o‘rnatsin.

9. Qo‘mita:

a) ikki oy muddatda:

markaziy apparat va hududiy bo‘linmalarning Qo‘mitaga yuklangan vazifalarni professional darajada bajarishga qodir bo‘lgan, zarur nazariy bilim va amaliy ko‘nikmalarga ega yuqori malakali kadrlar bilan tanlov asosida to‘ldirilishini;

tarkibiy va bo‘ysunuvidagi bo‘linmalar, shu jumladan mahalladagi xotin-qizlar faoli to‘g‘risidagi nizomlar, shuningdek, xodimlarning lavozim yo‘riqnomalari tasdiqlanishini ta’minlasin;

b) uch oy muddatda Axborot texnologiyalari va kommunikatsiyalarini rivojlantirish vazirligi bilan birgalikda Qo‘mita va uning hududiy bo‘linmalarini yuqori tezlikdagi Internet tarmog‘iga ulanishini hamda zarur aloqa, jumladan, Qo‘mitani hukumat aloqasi bilan ta’minlasin.

10. Belgilansinki, Qo‘mita va uning hududiy bo‘linmalari o‘zlariga yuklatilgan funksiyalarga muvofiq belgilangan tartibda quyidagi huquqlarga ega:

Qo‘mitaga tegishli vazifalarni amalga oshirish uchun, zarur hollarda, davlat organlari, ilmiy muassasalar va boshqa tashkilotlarning rahbarlari hamda mutaxassislarini jalb qilish, ishchi guruhlar tuzish;

Qo‘mita vakolatiga kiruvchi masalalar yuzasidan davlat organlari va tashkilotlaridan statistik, tahliliy materiallar, xulosalar va boshqa ma’lumotlarni so‘rash va olish;

davlat organlari va tashkilotlari rahbarlariga xotin-qizlar huquqlari va qonuniy manfaatlarini ta’minlash hamda oilani mustahkamlash borasidagi qonunchilik hujjatlari buzilishi, ularni keltirib chiqaruvchi sabab va shart-sharoitlarni bartaraf etish bo‘yicha ko‘rib chiqilishi majburiy bo‘lgan taqdimnomalar kiritish;

xotin-qizlar huquqlari va qonuniy manfaatlarini ko‘zlab sudlarga ariza (shikoyat) va da’volarni kiritish;

xotin-qizlar huquqlari va qonuniy manfaatlarini ta’minlash hamda oilani mustahkamlashga doir tashabbuslar bilan chiqish hamda takliflar kiritish.

11. 2022-yil 1-maydan boshlab mahalladagi xotin-qizlar faolining oylik ish haqi miqdori u biriktirilgan mahalladagi xonadonlar soniga mutanosib ravishda quyidagicha belgilansin:

xonadonlar soni 500 tagacha bo‘lgan mahallada — mehnatga haq to‘lashning eng kam miqdorining 3,5 baravari miqdorida;

xonadonlar soni 501 tadan 1 000 tagacha bo‘lgan mahallada — mehnatga haq to‘lashning eng kam miqdorining 4 baravari miqdorida;

xonadonlar soni 1 000 tadan ortiq bo‘lgan mahallada — mehnatga haq to‘lashning eng kam miqdorining 4,5 baravari miqdorida.

Belgilansinki, faoliyat samaradorligi ko‘rsatkichlaridan kelib chiqib, mahallalardagi xotin-qizlar faollarini qo‘llab-quvvatlash maqsadida mehnatga haq to‘lash jamg‘armasining 15 foizi miqdorida moddiy rag‘batlantirish jamg‘armasi shakllantiriladi.

12. Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari 2022-yil 1-avgustga qadar mahalliy budjet mablag‘lari va qonunchilik hujjatlari bilan taqiqlanmagan boshqa manbalar hisobidan mahallalardagi xotin-qizlar faollarini “Ayollar daftari”ni yuritish, masofadan turib hisobotlar taqdim etish hamda videokonferensaloqa shaklida yig‘ilishlarda ishtirok etish imkonini beruvchi planshetlar bilan ta’minlasin.

Qo‘mita hamda Axborot texnologiyalari va kommunikatsiyalarini rivojlantirish vazirligi ikki oy muddatda planshetlarda foydalaniladigan dasturiy ta’minotni ishlab chiqsin va mahallalardagi xotin-qizlar faollariga taqdim etsin.

13. Qo‘mita Toshkent shahri, Mirzo Ulug‘bek tumani, Ismoiliy ko‘chasi, 1 G-uy manzili bo‘yicha operativ boshqaruv huquqi asosida joylashtirilsin.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Qo‘mita bilan birgalikda 2022-yil 1-aprelga qadar Qo‘mitaning hududiy bo‘linmalarini zarur bino va inshootlar bilan ta’minlash choralarini ko‘rsin.

14. Moliya vazirligi:

2022-yilda ushbu qarorni amalga oshirish doirasida Qo‘mitaning xarajatlari uchun “2022-yil uchun O‘zbekiston Respublikasining Davlat budjeti to‘g‘risida”gi Qonunga o‘zgartirish va qo‘shimchalar kiritish bo‘yicha Vazirlar Mahkamasiga takliflar kiritsin;

“2022-yil uchun O‘zbekiston Respublikasining Davlat budjeti to‘g‘risida”gi Qonunga tegishli o‘zgartirish va qo‘shimchalar kiritilgunga qadar Qo‘mita faoliyatini amalga oshirish bilan bog‘liq xarajatlar uchun mablag‘ ajratish choralarini ko‘rsin;

2023-yildan boshlab har yili Davlat budjeti parametrlarida zarur mablag‘larni ko‘zda tutsin.

15. Qo‘mita manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

16. Ushbu qarorning ijrosini nazorat qilish O‘zbekiston Respublikasining Bosh vaziri A.N. Aripov va O‘zbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.

 

O‘zbekiston Respublikasi Prezidenti                     Sh. MIRZIYOYEV

• 
• 
•