16.12.2016

Yig'ilishda viloyatni ijtimoiy-iqtisodiy rivojlantirish, uning eksport salohiyatini oshirish, istiqbolli yangi sanoat ob'ektlari barpo etish, ijtimoiy infratuzilmani yanada yaxshilash borasidagi dolzarb masalalar muhokama qilindi.

Prezident Surxondaryo viloyatida erishilayotgan yutuq va marralarni atroflicha tahlil qilar ekan, quyidagi raqam va dalillarga alohida e'tibor qaratdi.

Surxondaryo viloyatining tuprog'idan, quyoshli iqlimidan oqilona foydalanish kerak. Viloyatda 2019-yilgacha bosqichma-bosqich 26 ming 800 gektar, jumladan, 2017-yilda 18 ming gektar paxta maydonlari qisqartiriladi. Uning o'rniga meva-sabzavot etishtiruvchi fermer xo'jaliklari tashkil qilinadi.

Yurtboshimiz mamlakat iqtisodiyotini rivojlantirishda, fermerlik harakatining ahamiyati katta ekanini alohida ta'kidladi.

Prezident viloyatda erishilgan yutuqlarni qayd etish bilan birga yo'l qo'yilgan ayrim kamchilik va nuqsonlar, mavjud muammolarga ham to'xtalib o'tdi.

Sessiyada tashkiliy masala ko'rildi. T.Mamaraimov boshqa ishga o'tgani munosabati bilan Surxondaryo viloyati hokimi lavozimidan ozod qilindi. O'zbekiston Respublikasi Prezidenti Shavkat Mirziyoyev tavsiyasiga ko'ra Navoiy viloyati hokimi lavozimida ishlab kelayotgan Erkin Turdimov Surxondaryo viloyati hokimi etib tasdiqlandi.

Sessiyada so'zga chiqqan Sherobod tumani hokimi Abdurahim Eshmurodov, “Mahalla” jamoat fondi viloyat bo'limi raisining o'rinbosari Orzuqul Soatov, Termiz davlat universiteti professori Sayfulla Tursunov, Mannon Uyg'ur nomidagi viloyat musiqali drama teatri bosh rejissyori Mansur Ravshanov va boshqalar Prezident nutqida bayon etilgan tanqidiy fikrlardan zarur xulosalar chiqarib, ko'rsatib o'tilgan kamchilik-nuqsonlarni bartaraf qilish, viloyatni ijtimoiy-iqtisodiy rivojlantirishga qaratilgan dolzarb vazifalarni muvaffaqiyatli ado etish uchun butun Surxondaryo ahli astoydil mehnat qilishi va ko'zlangan marralarga albatta erishishini ta'kidladilar.