11.06.2025

Ҳурматли йиғилиш иштирокчилари!

Ҳурматли Одиль Рено-Бассо хоним!

Хорижий инвесторлар кенгашининг навбатдаги йиғилишида сизлар билан учрашиб турганимдан беҳад хурсандман.

Биз кеча Халқаро инвестиция форумида иқтисодиётимизни янада ривожлантириш масалаларини, стратегик аҳамиятга эга бўлган йўналишларни атрофлича муҳокама қилдик.

Бугун эса сизлар билан тажриба алмашиш, аниқ лойиҳаларингизни амалга ошириш, янги ташаббус ва таклифлар бўйича яқиндан маслаҳатлашиб оламиз.

Бундай форматдаги дўстона мулоқотларимиз ўзининг амалий натижадорлиги, янги-янги лойиҳаларни рўёбга чиқаришга қўшаётган беқиёс ҳиссаси билан алоҳида ажралиб туради.

Аввалги учрашувларимиз ўз самарасини бера бошлади. Шу ўринда айрим мисолларни келтириб ўтмоқчиман.

Халқаро молия ташкилотлари билан мутлақо янгича ишлашга ўтиб, аниқ натижага қаратилган самарали ҳамкорлик тизимини жорий этдик. Хусусан, Европа тикланиш ва тараққиёт банки ўтган йили Ўзбекистонга рекорд миқдорда – 1 миллиард долларга яқин инвестиция киритди. Мамлакатимиз ушбу банкнинг минтақадаги энг йирик ҳамкорига айланди.

Бундай ютуқларимизда Рено-Бассо хонимнинг улкан ҳиссаси борлигини, албатта, яхши биламиз ва юксак қадрлаймиз. Яна бир бор сизга ўз миннатдорлигимни билдираман.

Шунингдек, халқаро молия ташкилотларининг хусусий сектор билан ҳамкорлиги кескин кучайиб, улар бир қатор илғор корхоналарга тўғридан-тўғри инвестициялар киритишди. Жумладан, бир йил давомида уларнинг хусусий компания ва банклар билан қўшма лойиҳалари ҳажми 1 миллиард доллардан ортди.

Яна бир йўналиш. Бугун бу учрашувда қатнашаётган компаниялар “яшил” энергия, чиқиндиларни қайта ишлаш, электр энергиясини сақлаш, “яшил” водород ишлаб чиқариш каби илғор соҳаларда янги лойиҳаларни бошлаганини алоҳида таъкидламоқчиман.

Бу борада “Acwa Power”, “Masdar”, “Linde”, “Shanghai Environment”, “Total Energies” сингари етакчи компаниялар 8 миллиард доллардан зиёд инвестиция киритиб, “яшил” иқтисодиётни ривожлантиришга катта ҳисса қўшмоқда.

Рақамли технологиялар соҳасида ҳам дунё тан олган нуфузли компаниялар юртимизга жадал кириб келмоқда. Айниқса, “DataVolt” компанияси минтақадаги энг йирик “яшил дата марказ”ни, “Veon” компанияси сунъий интеллектга асосланган “мобиль супер-илова”ни яратиш бўйича лойиҳаларни бошлагани бизни жуда қувонтиради.

Ҳеч шубҳасиз, бундай лойиҳалар келажакнинг мустаҳкам пойдевори бўлиб хизмат қилади.

Бундай мисолларни кўплаб келтиришимиз мумкин.

Буни хорижий инвесторларнинг ислоҳотларимизга бўлган юксак ишончи, очиқлик сиёсатимизнинг яққол мисоли, деб биламан.

Кенгашимиз аъзолари бўлган Халқаро молия корпорацияси, “Ernst & Young”,  “Dentons”, “Knauf”, “TBC” каби компаниялар миллий қонунчиликни халқаро стандартлар асосида янада такомиллаштириш бўйича қатор таклифлар берди. Сизларнинг янги ташаббус ва ғояларингиз 10 дан ортиқ қонун, фармон ва қарорларимизда ўз аксини топди.

Умуман олганда, юртимизда ишлаётган инвесторларнинг фаоллиги ошиб, сўнгги икки йилда чет эл капитали иштирокидаги 5,5 мингта янги корхона ташкил этилди. Уларнинг умумий сони 16 мингтага етди.

Ҳурматли дўстлар!

Биз бугунги учрашувга мутлақо бошқача тайёргарлик кўрдик. Хорижий корхоналар билан бирма-бир гаплашиб, билдирилган 40 дан зиёд ташаббусларни саралаб олдик. Жумладан, сармоядорлар солиқ қонунчилиги барқарорлигини таъминлаш, тўғридан-тўғри амал қиладиган қонунларни кўпайтириш, инфратузилма соҳаларида хусусий сектор улушини ошириш бўйича таклифларни бердилар.

Биз уларнинг барчасини албатта инобатга оламиз ва Кенгаш аъзолари билан ҳар бир таклиф устида жиддий ишлаяпмиз. Масалан, 2028 йилга қадар бизнес учун асосий солиқ ставкалари ўзгармаслигини эълон қилдик. Жорий йилда йўл, транспорт, энергия, сув, ирригация соҳаларида қарийб 4,5 миллиард долларлик давлат-хусусий шериклик лойиҳаларини бошладик. Халқаро молия ҳисоботлари стандартларига ўтиш ҳамда экологик, ижтимоий ва корпоратив бошқарувни жорий этиш бўйича норматив ҳуқуқий ҳужжатлар ишлаб чиқилмоқда.

Кўп мурожаатлар электр тармоқларига уланиш бўйича келиб тушди. Бунда, албатта, энг илғор хорижий тажрибадан фойдаланишимиз шарт ва зарур. Шунинг учун бу борада Кенгашимиз қошида алоҳида ишчи гуруҳ тузиб, аниқ механизмларни ишлаб чиқишни таклиф қиламан.

Тушган таклифлардан келиб чиқиб, гаров тўғрисидаги қонунчиликни такомиллаштириш, хорижий компаниялар учун профессионал кадрларни тайёрлаш, маҳаллий компанияларда корпоратив бошқарувни яхшилаш, солиқ маъмурчилиги бўйича қўшимча ишчи гуруҳлар ташкил этилади.

Ўтган йиғилишимизда кун тартибидаги энг долзарб йўналишларда – рақамлаштириш, масъулиятли бизнес юритиш ва муқобил инвестиция бўйича ишчи гуруҳлар тузиб олган эдик. Бугун уларнинг тақдимотлари билан танишамиз.

Яна бир муҳим масала. Охирги бир йилда Кенгашимиз иши кескин фаоллашди. Шу билан бирга, Кенгаш котибияти нафақат инвестиция вазирлиги билан, балки бошқа вазирлик ва идоралар, халқаро ташкилот ва инвесторлар билан ҳам бевосита ишлаяпти. Шунинг учун Котибиятнинг мустақиллигини ошириб, уни алоҳида юридик шахс сифатида қайта ташкил этсак, мақсадга мувофиқ бўлар эди.

Бу масала бўйича ҳам сизларнинг фикрларингизни билмоқчи эдим.

Азиз дўстлар!

Бугун бўлиб ўтган сермаҳсул мулоқотларимиздан жуда мамнунман. Очиғини айтганда, сизлардан мана шундай жўшқин ва амалий фикрларни кутган эдим.

Ҳар бир таклиф ва мулоҳаза батафсил кўриб чиқилади. Ҳукуматимиз томонидан алоҳида “йўл харитаси” қабул қилинади.

Яна бир бор таъкидламоқчиман: биз инвесторлар учун очиқ, эркин, барқарор ва ишончли мамлакат – Янги Ўзбекистонни барпо этмоқдамиз.

Бу йўлда бошлаган ва ортга қайтмас тус олган ислоҳотларимизни бундан буён ҳам изчил давом эттирамиз.

Сизларни юртимизга шунчаки сармоя киритишга эмас, балки муваффақиятимиз тарихининг чинакам иштирокчиларига, биз яратаётган буюк келажакнинг ажралмас қисмига айланишга чорлаймиз.

Муштарак интилиш ва саъй-ҳаракатларимиз орқали ҳар бир лойиҳа самарали ҳамкорлигимизнинг ёрқин намунасига айланишига ишонамиз.

Ҳаммангизга бу эзгу йўлда катта ютуқ ва янги омадлар тилайман.

• 
• 
•