22.05.2025
Ўзбекистон Республикаси Президенти Шавкат Мирзиёевнинг Словения Республикасига расмий ташрифи якунига етди.
Сўнгги 20 йил ичида биринчи Ўзбекистон-Словения саммити икки томонлама муносабатлар тарихида янги босқични бошлаб берди.
Ташриф доирасида Словения Республикаси Президенти Наташа Пирц Мусар, Бош вазири Роберт Голоб ва Миллий ассамблеяси Раиси Уршка Клакочар-Зупанчич билан сермазмун музокаралар бўлиб ўтди.
Томонлар сиёсат, иқтисодиёт, инвестициялар, саноат кооперацияси, экология, маданият, туризм ва таълим соҳаларини қамраб олган кенг кўламли масалаларни муҳокама қилдилар.
Қўшма баёнот, шунингдек, устувор йўналишларда эришилган келишувларни мустаҳкамлаб қўйган ҳукуматлараро ва идоралараро битимларнинг салмоқли тўплами қабул қилинди.
Ташриф якунида давлат раҳбарлари ва икки мамлакатнинг 100 га яқин етакчи компаниялари вакиллари иштирокида Ўзбекистон-Словения бизнес форуми бўлиб ўтди.
Любляна халқаро аэропортида олий мартабали меҳмонни ички ишлар вазири Боштян Поклукар ва бошқа расмий шахслар кузатиб қўйди. Давлатимиз раҳбари Тошкентга жўнаб кетди.
Маълумотлардан фойдаланилганда www.president.uz га ҳавола кўрсатилиши шарт
© 2025 Ўзбекистон Республикаси Президентининг расмий веб-сайти
Барча ҳуқуқлар ҳимояланган
Диққат! Агар сиз матнда хатоликларни аниқласангиз, уларни белгилаб, маъмуриятни хабардор қилиш учун Ctrl+Enter тугмаларини босинг
