18.03.2025

Ўзбекистон Республикаси Президенти Шавкат Мирзиёев ва Қирғиз Республикаси Президенти Садир Жапаров 18 март куни телефон орқали мулоқот қилдилар.

Етакчилар яқинлашиб келаётган баҳор ва янгиланиш байрами – Наврўз муносабати билан бир-бирларини самимий қутлаб, биродар халқларимизга тинчлик-осойишталик ва фаровонлик тиладилар.

Ўзбекистон етакчиси Қирғизистон Президентини музокаралар муваффақиятли якунлангани ва Қирғизистон-Тожикистон давлат чегарасини делимитация қилиш тўғрисидаги шартнома имзолангани билан ҳам табриклади.

Олий даражадаги келишувларни, энг аввало, савдо, саноат кооперацияси, логистика, энергетика, қишлоқ хўжалиги, туризм ва бошқа устувор йўналишларда ўзаро манфаатли ҳамкорлик лойиҳаларини амалга ошириш масалалари муҳокама қилинди.

Транспорт-транзит ва энергетика инфратузилмасини ривожлантириш бўйича йирик минтақавий лойиҳаларни жадаллаштириш муҳимлиги қайд этилди.

Ўзбекистон ва Қирғизистон етакчилари бўлажак олий даражадаги уч томонлама учрашувга, шунингдек, Самарқанд шаҳрида ўтказиладиган "Марказий Осиё - ЕИ" саммити ва Иқлим форумига тайёргарлик кўриш масалаларига алоҳида тўхталдилар.

 

• 
• 
•