10.05.2019

Тошкент шаҳрининг Чилонзор тумани Боғистон кўчасидаги уйлар режалаштирилган лойиҳалар изчил амалга оширилаётганига яна бир мисол. Президент Шавкат Мирзиёев 2018 йил 21 декабрь куни бу ерга келиб, қурилиш макетлари билан танишган, зарур кўрсатмалар берган эди. Орадан беш ой ўтиб, бу ерда улкан ва замонавий мавзе пайдо бўлди. 

9 қаватли 24 та уй бунёд этилиши лойиҳалаштирилган. Ҳозирда 10 та уйда қурилиш якунланиб, ички ва ташқи пардозлаш ишлари олиб борилмоқда.

Давлатимиз раҳбарига уйларнинг қурилиш технологияси, сифати ҳақида маълумот берилди. 

Уйлар инновацион усуллар асосида қурилган бўлиб, деворлари қўшимча материаллар билан қопланган. Бу иссиқликни сақлаш, энергияни тежаш имконини беради.  Иситиш ва совитиш тизими ҳар бир хонадонда мустақил бошқарилади. 

Президентимиз бу уйларнинг сифати, энергияни тежаши халқимизга маъқуллиги, шу тажриба асосида мамлакатимизнинг бошқа ҳудудларида ҳам турар жойларни кўпайтириш зарурлигини таъкидлади.