02.03.2018

Президент Шавкат Мирзиёев Томди туманидаги 12-болалар мусиқа ва санъат мактаби фаоллар залида Томди, Учқудуқ, Конимех туманлари ва Зарафшон шаҳри жамоатчилиги вакиллари, оқсоқоллар, тадбиркорлар, ёшлар билан мулоқот қилди.

Самимий мулоқот чоғида мамлакатимизда амалга оширилаётган кенг кўламли ислоҳотлар, қўшни давлатлар билан дўстона ҳамкорлик, вилоят иқтисодиётини ривожлантириш, ҳар қайси қишлоқ, туман ва шаҳарда одамларни қийнаётган масалаларни бартараф этиш, янги иш ўринлари яратиш, таълим-тарбия масалалари хусусида сўз юритилди.

Шавкат Мирзиёев Навоий вилоятининг кўп миллатли аҳолиси аҳил-иноқ, биродарлиги билан барчага ўрнак бўлаётгани, ўзбекни қозоқдан ёки русдан ажратиб бўлмаслигини, улар мамлакатимиздаги барча ўзгаришларга муносиб ҳиссасини қўшиб келаётганини алоҳида таъкидлади.

Йиғилишда вилоятдаги қозоқ миллий маданият маркази фаоллари, Ўзбекистон ёшлар иттифоқи туман кенгашлари раҳбарлари, педагоглар, шифокорлар, спорт мураббийлари, тадбиркорлар сўзга чиқиб, Президентимизнинг чекка ҳудудлар аҳолиси билан бевосита учрашаётгани одамларнинг эртанги кунга бўлган ишончини ошираётгани, мактабгача таълим тизимидаги ўзгаришлар, ёшлар тарбиясини тўғри ташкил этилаётгани жамиятда муҳит ўзгаришига олиб келаётгани ҳақида фикр-мулоҳаза билдирдилар.

Шу билан бирга, тадбирда ўз ечимини кутаётган қатор муаммолар тилга олиниб, уларни жойида ҳал қилиш бўйича мутасаддиларга тегишли кўрсатмалар берилди.

Шавкат Мирзиёев энг чекка туманлар аҳолисининг маънавиятини ошириш, саломатлигини мустаҳкамлаш, бандлигини таъминлаш масалалари давлатимизнинг диққат эътиборида экани, вилоятдаги кенг қамровли ўзгаришлар одамларга муносиб турмуш шароити яратишга хизмат қилишини алоҳида таъкидлади.