15.10.2026
Boku shahrida Osiyoda hamkorlik va ishonch choralari boʻyicha kengash sammiti doirasida Oʻzbekiston Respublikasi Prezidenti Shavkat Mirziyoyev Kambodja Qirolligi Bosh vaziri Xun Manet bilan uchrashuv oʻtkazdi.
Ikki mamlakat oʻrtasidagi amaliy hamkorlikni yanada rivojlantirish istiqbollari koʻrib chiqildi.
Tizimli siyosiy muloqotni yoʻlga qoʻyish, parlamentlararo, madaniy-gumanitar va sayyohlik yoʻnalishlaridagi almashinuvlarni faollashtirish muhimligi taʼkidlandi.
Tovar ayirboshlash hajmini oshirish boʻyicha amaliy choralar koʻrish, jumladan, mamlakatlarning sanoat salohiyatini namoyish etish uchun koʻrgazmalar oʻtkazish va ishbilarmonlik delegatsiyalarining tashriflarini tashkil etish masalalariga alohida eʼtibor qaratildi.
Tomonlar bu borada savdo-iqtisodiy va investitsiya sohalaridagi asosiy kelishuvlarni ishlab chiqishni jadallashtirishga kelishib oldilar.
Xalqaro va mintaqaviy ahamiyatga molik dolzarb masalalar, xususan, BMT, ShHT, ASEAN, Qoʻshilmaslik harakati va boshqa tuzilmalar doirasidagi yaqin hamkorlikni davom ettirish yuzasidan ham fikr almashildi.
Ma'lumotlardan foydalanilganda
www.president.uz ga havola ko‘rsatilishi shart
© 2026 O‘zbekiston Respublikasi Prezidentining rasmiy veb-sayti
Barcha huquqlar himoyalangan
Diqqat! Agar siz matnda xatoliklarni aniqlasangiz, ularni belgilab, ma`muriyatni xabardor qilish uchun Ctrl+Enter tugmalarini bosing
