31.08.2025

Mamlakatimiz mustaqilligining 34 yilligi munosabati bilan O‘zbekiston Respublikasi Prezidenti Shavkat Mirziyoyev nomiga xorijiy davlatlar, parlamentlar va hukumatlar, yetakchi xalqaro va mintaqaviy tashkilotlar, yirik korporatsiya va kompaniyalar rahbarlari, taniqli siyosatchilar, jamoat va din arboblaridan samimiy qutlovlar kelmoqda.

Kelib tushayotgan maktublarda Yangi O‘zbekistonda amalga oshirilayotgan keng ko‘lamli islohotlar strategiyasining natijalari, mintaqada do‘stlik, sheriklik va yaxshi qo‘shnichilik muhitini mustahkamlash, dunyo mamlakatlari bilan o‘zaro manfaatli hamkorlikni kengaytirishga qaratilgan pragmatik va konstruktiv tashqi siyosat yuqori baholanmoqda. Ijtimoiy-iqtisodiy sohalarda erishilgan yutuqlar, davlat va jamiyat hayotining barcha jabhalaridagi muvaffaqiyatlar, O‘zbekistonning xalqaro maydondagi nufuzi ortib borayotgani alohida qayd etilgan.

Ko‘p millatli O‘zbekiston xalqiga tinchlik-osoyishtalik, farovonlik va ravnaq tilaklari izhor etilgan.

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Shavkat Miromonovich!

Mamlakatingizning milliy bayrami – Mustaqillik kuni munosabati bilan samimiy tabriklarimni qabul qilgaysiz.

O‘zbekiston ijtimoiy va iqtisodiy sohalarda ulkan muvaffaqiyatlarga erishdi, jahon maydonidagi nufuzi tobora ortib bormoqda, mintaqaviy va xalqaro kun tartibidagi ko‘plab muhim masalalarni hal etishga amaliy hissa qo‘shmoqda.

Davlatlarimiz o‘rtasidagi munosabatlar strategik sheriklik va ittifoqchilik ruhida jadal rivojlanmoqda. MDH, SHHT va boshqa ko‘p tomonlama tuzilmalar doirasida sa’y-harakatlarni samarali muvofiqlashtirish yo‘lga qo‘yilgan.

Ishonchim komilki, biz bundan buyon ham Rossiya bilan O‘zbekiston o‘rtasidagi o‘zaro manfaatli aloqalarni barcha yo‘nalishlarda har tomonlama rivojlantiramiz. Bu do‘st xalqlarimiz manfaatlariga, Markaziy Osiyoda xavfsizlik va barqarorlikni mustahkamlash maqsadlariga to‘la mos keladi. 

Sizga, muhtaram Shavkat Miromonovich, mustahkam sog‘liq va muvaffaqiyatlar, barcha yurtdoshlaringizga farovonlik va ravnaq tilayman.

Hurmat bilan,

 

Vladimir Putin,

Rossiya Federatsiyasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Prezident janoblari!

O‘zbekiston Respublikasi mustaqilligining 34 yilligi munosabati bilan Sizga va do‘st O‘zbekiston xalqiga samimiy tabriklarim va eng ezgu tilaklarimni izhor etishga ijozat bergaysiz.

Sizning rahbarligingizda O‘zbekiston iqtisodiyoti jadal rivojlanmoqda, xalqning turmush darajasi yuksalmoqda, mamlakat dadil qadamlar bilan strategik maqsad – Yangi O‘zbekistonni barpo etish sari bormoqda. Bu do‘st va qo‘shni, har qanday sharoitda strategik sherik sifatida Xitoyni behad quvontiradi.

Joriy yil iyun oyida Ostonada bo‘lib o‘tgan uchrashuvimizda ikki mamlakatning har tomonlama hamkorligi bo‘yicha muhim kelishuvlarga erishildi. Xitoy va O‘zbekiston o‘rtasidagi ikki tomonlama munosabatlarni yanada rivojlantirish bo‘yicha yangi reja tuzildi. Siz bilan siyosiy o‘zaro ishonchni uzluksiz chuqurlashtirish, bir-birimizni qat’iy qo‘llab-quvvatlash, rivojlanish strategiyalarining o‘zaro bog‘liqligini mustahkamlash, “Bir makon, bir yo‘l”ni birgalikda sifatli barpo etish bo‘yicha sa’y-harakatlarni amalga oshirishga tayyorman.

O‘zbekiston Respublikasiga kuch-qudrat va ravnaq, uning xalqiga baxt-saodat va farovonlik tilayman.

 

Si Szinpin,

Xitoy Xalq Respublikasi Raisi

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Prezident janoblari!

Amerika Qo‘shma Shtatlari xalqi nomidan Sizga va O‘zbekiston xalqiga mamlakatingiz mustaqilligining 34 yilligi munosabati bilan eng ezgu tilaklarimizni yo‘llayman. Bu uning tarixi va boy madaniyatini eslash uchun quvonchli sababdir.

O‘zbekiston mustaqillikka erishganidan buyon mamlakatlarimiz o‘rtasidagi jadal strategik sheriklikka hissa qo‘shadigan muhim islohotlarni davom ettirmoqda. Biz umumiy manfaatlarimizni ilgari surish, jumladan, chegaralarimizni mustahkamlash, ikki tomonlama savdo va investitsiyalarni ko‘paytirish, diniy erkinlik va mintaqaviy barqarorlikni ta’minlash yo‘lida birgalikda salmoqli ishlarni amalga oshirdik.

Qo‘shma Shtatlar mavjud aloqalarni mustahkamlash va o‘zaro manfaatli hamkorlikning yangi imkoniyatlarini ochishga umid qilmoqda. Sizga va fuqarolaringizga Mustaqillik bayrami munosabati bilan baxt-saodat va eng ezgu tilaklarimni bildiraman.

Hurmat bilan,

 

Donald Tramp,

Amerika Qo‘shma Shtatlari Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Shavkat Miromonovich!

Qozog‘iston xalqi va shaxsan o‘z nomimdan Sizni va barcha yurtdoshlaringizni Mustaqillik kuni bilan samimiy muborakbod etaman.

Ushbu tarixiy sana qardosh O‘zbekistonning taraqqiyot yo‘lidan dadil, izchil rivojlanib borayotganining yorqin ramzidir. Qozog‘iston Sizning hozirgi murakkab geosiyosiy sharoitda Yangi O‘zbekistonni barpo etishga qaratilgan chuqur o‘ylangan, keng ko‘lamli islohotlaringizni to‘liq qo‘llab-quvvatlaydi.

Sizning kuchli va obro‘li rahbarligingizda O‘zbekiston ijtimoiy-iqtisodiy taraqqiyot va xalqaro maydonda milliy manfaatlarni himoya qilish borasida ulkan muvaffaqiyatlarga erishdi.

Qozog‘iston O‘zbekistonning strategik sherigi va ishonchli ittifoqchisi sifatida mamlakatingiz bilan ko‘p qirrali davlatlararo aloqalarni yanada chuqurlashtirishga alohida ahamiyat qaratadi.

Ishonchim komilki, Qozog‘iston – O‘zbekiston munosabatlari bundan buyon ham qardosh xalqlarimiz farovonligi, Markaziy Osiyoda barqarorlik va xavfsizlik manfaatlari yo‘lida ko‘p asrlik do‘stlik, yaxshi qo‘shnichilik va o‘zaro qo‘llab-quvvatlash ruhida jadal rivojlanib boraveradi.

Fursatdan foydalanib, Sizga, muhtaram Shavkat Miromonovich, davlatchilik faoliyatingizda yangi muvaffaqiyatlar, qardosh O‘zbekiston xalqiga farovonlik va ravnaq tilayman.

Hurmat bilan,

 

Qasim-Jomart Toqayev,

Qozog‘iston Respublikasi Prezidenti 

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Shavkat Miromonovich!

Sizni va O‘zbekiston xalqini O‘zbekiston Respublikasi mustaqilligining 34 yilligi bilan samimiy muborakbod etaman.

Mustaqillik har bir davlatning o‘z yo‘lini tanlashi va xalq farovonligi uchun mas’uliyatni o‘z zimmasiga olishi uchun imkoniyatdir. O‘zbekiston bu imkoniyatdan unumli foydalanib, jahon hamjamiyatida munosib o‘rin egallab kelayotgani quvonarlidir.

Bugungi kunda O‘zbekiston barcha asosiy tarmoqlarda, ayniqsa, iqtisodiy, ijtimoiy va siyosiy sohalarda barqaror va ishonchli rivojlanmoqda.

Bu muvaffaqiyatlar Sizning boy tajribangiz va ajoyib yetakchiligingiz natijasidir.

Mamlakatlarimiz o‘rtasidagi strategik sheriklik barqaror rivojlanib borayotganini alohida qayd etmoqchiman.

Ishonchim komilki, qardosh xalqlarimiz o‘rtasida qaror topgan yaxshi qo‘shnichilik va do‘stona munosabatlar yangi bosqichga ko‘tariladi, Qirg‘iziston bilan O‘zbekistonning har tomonlama hamkorligi bundan buyon ham izchil rivojlanib boraveradi.

Sizga, muhtaram Shavkat Miromonovich, mustahkam sog‘liq, bitmas-tuganmas kuch-g‘ayrat, uzoq umr, oilaviy baxt-saodat, mas’uliyatli faoliyatingizda ulkan zafarlar, qardosh O‘zbekiston xalqiga esa tinchlik-osoyishtalik va ravnaq tilayman.

Hurmat bilan,

 

Sadir Japarov,

Qirg‘iz Respublikasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Qadrli Shavkat Miromonovich!

Mamlakatingiz milliy bayrami – Mustaqillik kuni munosabati bilan Sizga va birodar O‘zbekiston xalqiga samimiy tabriklarimiz va eng ezgu tilaklarimizni yo‘llash menga katta mamnuniyat bag‘ishlaydi.

O‘zbekiston o‘zining har tomonlama rivojlanish yo‘lida ulkan natijalarga erishib, xalqaro maydonda katta obro‘-e’tibor qozongani quvonarlidir.

Tojikiston eng yaqin qo‘shnisining yutuqlaridan xursand va unga o‘zining ishonchli hamkori sifatida qaraydi.

Biz Tojikiston va O‘zbekiston o‘rtasidagi iliq, do‘stona, yaxshi qo‘shnichilik hamda sermazmun munosabatlarni qadrlaymiz va ularga alohida ahamiyat beramiz.

O‘zbekiston bilan hamkorlikning izchil rivojlanib borayotgani Tojikiston tashqi siyosatining ustuvor yo‘nalishlari orasida muhim o‘rin tutadi.

Mamlakatlarimiz o‘rtasidagi strategik sheriklik hamda ittifoqchilik munosabatlari har tomonlama rivojlanayotgani va kengayib borayotganidan mamnunmiz.

Ishonchim komilki, umumiy chora-tadbirlar bilan barcha salohiyatli imkoniyatlarni to‘liq ishga solamiz va mamlakatlarimiz farovonligi yo‘lida oldimizga qo‘ygan maqsadlarga erishamiz.

Biz, o‘z navbatida, xalqlarimiz farovonligi yo‘lida tomonlar hamkorligining ijobiy dinamikasini mustahkamlash uchun bundan buyon ham birgalikdagi sa’y-harakatlarni davom ettirishga tayyormiz.

Sizga, muhtaram Shavkat Miromonovich, mustahkam sog‘liq, baxt-saodat va mas’uliyatli davlatchilik faoliyatingizda yangi zafarlar, birodar O‘zbekiston xalqiga esa tinchlik-osoyishtalik, farovonlik va bardavom taraqqiyot tilayman.

Katta hurmat bilan,

 

Emomali Rahmon,

Tojikiston Respublikasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Shavkat Miromonovich!

Turkmaniston xalqi va Hukumati nomidan, shuningdek, shaxsan o‘z nomimdan Sizga va Siz orqali qardosh O‘zbekiston Respublikasi xalqiga mamlakatingiz Mustaqillik kuni munosabati bilan samimiy tabriklarim va eng ezgu tilaklarimni yo‘llash sharafiga muyassarman.

Bugungi kunda O‘zbekiston Respublikasi siyosiy, ijtimoiy-iqtisodiy va boshqa sohalarda taraqqiyot va ravnaq yo‘lidan dadil bormoqda. Yaqin qo‘shnimizning yutuqlaridan xursandmiz.

Turkmaniston va O‘zbekiston Respublikasi o‘rtasidagi hozirgi ikki tomonlama munosabatlar konstruktiv va barqaror xususiyatga ega ekanini mamnuniyat bilan qayd etmoqchiman. Ular eng keng doiradagi yo‘nalishlar bo‘yicha rivojlanmoqda. Birgalikdagi sa’y-harakatlarimiz bilan Turkmaniston – O‘zbekiston qardoshlik munosabatlari xalqlarimiz farovonligi yo‘lida yanada rivojlanib, mustahkamlanib borishiga qat’iy ishonaman.

Ushbu yoqimli imkoniyatdan foydalanib, Sizga, muhtaram Shavkat Miromonovich, mustahkam sog‘liq, baxt-saodat va mas’uliyatli davlatchilik faoliyatingizda yangi muvaffaqiyatlar, qardosh O‘zbekiston xalqiga esa tinchlik-osoyishtalik, farovonlik va ravnaq tilayman!

Chuqur hurmat bilan,

 

Serdar Berdimuhamedov,

Turkmaniston Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Shavkat Miromonovich!

Mamlakatingiz Mustaqilligi kuni munosabati bilan Sizga va Siz orqali qardosh O‘zbekiston xalqiga samimiy tabriklarim va eng ezgu tilaklarimni yo‘llayman.

O‘zbekiston mustaqillikka erishganidan buyon siyosiy, iqtisodiy va ijtimoiy taraqqiyotda ulkan muvaffaqiyatlarga erishdi, xalqaro maydonda munosib obro‘-e’tibor qozondi, mintaqaviy va global kun tartibidagi dolzarb masalalarni hal etishda konstruktiv rol o‘ynamoqda.

Yaqinda “Avaza” milliy sayyohlik zonasida “Turkmaniston – Ozarbayjon – O‘zbekiston” oliy darajadagi uchrashuvi doirasida bo‘lib o‘tgan uchrashuvimizni alohida mamnuniyat bilan eslayman. Unda tomonlarning mamlakatlarimiz o‘rtasidagi ko‘p qirrali hamkorlikni izchil kengaytirish va mustahkamlashga intilishi yana bir bor tasdiqlandi.

Ushbu yoqimli imkoniyatdan foydalanib, Sizga, muhtaram Shavkat Miromonovich, mustahkam sog‘liq, baxt-saodat va farovonlik, qardosh O‘zbekiston Respublikasi xalqiga esa tinchlik-osoyishtalik, bardavom taraqqiyot va ravnaq tilayman.

Chuqur hurmat bilan,

 

Gurbanguli Berdimuhamedov,

Turkman xalqining milliy yetakchisi, Turkmaniston Xalq Maslahati Raisi

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Shavkat Miromonovich!

Qadrli qardoshim!

O‘zbekiston Respublikasining milliy bayrami – Mustaqillik kuni munosabati bilan shaxsan o‘z nomimdan va Ozarbayjon xalqi nomidan Sizga samimiy tabriklarim va eng ezgu tilaklarimni yo‘llayman.

Bugun biz qardosh mamlakat sifatida mamlakatingiz Siz belgilab bergan Yangi O‘zbekiston strategiyasi asosida jadal va har tomonlama rivojlanayotgani, barcha sohalarda taraqqiyotga erishilayotgani, iqtisodiy salohiyat mustahkamlanib, global miqyosda obro‘-e’tibor va o‘rningiz yuksalib borayotganini quvonch bilan kuzatmoqdamiz. O‘zbekiston erishayotgan barcha yutuqlar Sizning ko‘p qirrali faoliyatingiz, uzoqni ko‘zlagan siyosatingiz, Vatan va xalq oldidagi sharafli xizmatingiz natijasidir.

Ozarbayjon – O‘zbekiston munosabatlari tarixi, tili va madaniyati mushtarak bo‘lgan xalqlarimiz o‘rtasida qaror topgan yaxshi qardoshlik aloqalarini yaqqol aks ettiradi.

Davlatlararo munosabatlarning izchil rivojlanishida o‘zaro tashriflar va oliy darajadagi uchrashuvlar muhim o‘rin tutadi. Sizning iyul oyida Ozarbayjonga davlat tashrifingiz ikki tomonlama munosabatlarimizning ittifoqchilik xususiyatini yana bir bor tasdiqladi. Ishonchim komilki, Ozarbayjon va O‘zbekiston o‘rtasidagi hamkorlikning keyingi yo‘nalishlari bo‘yicha erishilgan muhim kelishuvlar, shuningdek, turli sohalarda, ayniqsa, iqtisodiy sheriklikni diversifikatsiya qilish bo‘yicha imzolangan hujjatlar hamkorligimiz ko‘lamini kengaytirish, ittifoqchilik munosabatlarini yanada mustahkamlash va chuqurlashtirishga xizmat qiladi.

Birgalikdagi sa’y-harakatlarimiz bilan kun sayin yangi mazmun bilan boyib borayotgan qardosh O‘zbekiston bilan hamkorligimizni, ayniqsa, iqtisodiyot va savdo, energetika, investitsiyalar, qishloq xo‘jaligi, transport va logistika sohalaridagi aloqalarimizni bundan buyon ham kengaytirishga qat’iy qaror qilganmiz. O‘zaro anglashuv va ishonchning yuqori darajasi buning uchun qulay zamin yaratadi.

Ishonchim komilki, Ozarbayjon va O‘zbekistonning birodarligi bundan buyon ham barcha qo‘shma tashabbuslarimizni ro‘yobga chiqarishda muhim o‘rin tutib, mamlakatlarimiz taraqqiyoti va xalqlarimiz farovonligiga xizmat qiladi.

Hurmatli qardoshim!

Ushbu qutlug‘ ayyomda Sizni yana bir bor samimiy tabriklab, mustahkam sog‘liq, baxt-saodat, sharafli va mas’uliyatli faoliyatingizda muvaffaqiyatlar, qardosh o‘zbek xalqiga esa tinchlik-osoyishtalik, farovonlik va ravnaq tilayman.

Hurmat bilan,

 

Ilhom Aliyev,

Ozarbayjon Respublikasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Shavkat Miromonovich,

Sizni bosh bayramingiz – O‘zbekiston Respublikasining Mustaqillik kuni bilan chin qalbimdan samimiy muborakbod etaman.

Sizning rahbarligingizda mamlakatingiz ijtimoiy-iqtisodiy taraqqiyot yo‘lidan dadil bormoqda, mintaqaviy kun tartibidagi masalalarni hal etishda faol ishtirok etmoqda, jahon maydonidagi o‘rnini mustahkamlamoqda.

Minsk va Toshkent birodarlik rishtalari bilan chambarchas bog‘langan, turli yo‘nalishlarda samarali hamkorlik qilib kelmoqda. Sheriklikning bugungi darajasi bizga uchinchi mamlakatlar bozorlariga chiqish, ko‘p tomonlama tuzilmalar doirasida bir-birimizni qo‘llab-quvvatlash imkonini bermoqda.

Ishonchim komil, birgalikdagi sa’y-harakatlarimiz bilan ikki tomonlama konstruktiv munosabatlarni xalqlarimiz farovonligi yo‘lida ko‘p asrlik do‘stlik va mustahkam ishonch ruhida izchil rivojlantirishda davom etamiz.

Sizga, muhtaram Shavkat Miromonovich, mas’uliyatli davlatchilik faoliyatingizda yangi muvaffaqiyatlar, O‘zbekiston xalqiga esa farovonlik va ravnaq tilayman.

Hurmat bilan,

 

Aleksandr Lukashenko,

Belarus Respublikasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Muhtaram Prezident janoblari, aziz qardoshim!

Siz, Janobi Oliylariga va qardosh o‘zbek xalqiga Mustaqillik bayrami munosabati bilan eng samimiy tabriklarimni izhor etaman.

Mustaqillikka erishilgan kundan bugunga qadar o‘tgan 34 yillik vaqt davomida do‘st va qardosh O‘zbekiston, ayniqsa, Sizning rahnamoligingizda xalqaro mavqeini barqaror ravishda mustahkamlab, yanada farovon va yanada obod mamlakatga aylanib borayotganidan biz ham faxrlanamiz.

 Mushtarak insoniy rishtalarimizdan quvvat oluvchi o‘ziga xos munosabatlarimiz ikki tomonlama darajada va ko‘p tomonlama platformalarda, ayniqsa, Turkiy davlatlar tashkiloti doirasida kundan-kunga rivojlanib borayotganidan mamnunmiz.

O‘z navbatida, kelgusida o‘tkaziladigan Oliy darajadagi O‘zbekiston – Turkiya strategik hamkorlik kengashi yig‘ilishi munosabati bilan go‘zal mamlakatingizga tashrif buyurishni intiqlik bilan kutmoqdaman.

Fursatdan foydalanib, O‘zbekistonning Mustaqillik bayrami munosabati bilan yana bir bor samimiy qutlagan holda, Siz, Janobi Oliylariga sihat-salomatlik va baxt-saodat, qardosh o‘zbek xalqiga esa omonlik va farovonlik tilab qolaman.

 

Rejep Tayyip Erdog‘an, 

Turkiya Respublikasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Janobi Oliylari, hurmatli birodarim!

Hindiston xalqi va Hukumati nomidan Sizga va do‘st O‘zbekiston xalqiga mamlakatingiz Mustaqilligi kuni munosabati bilan samimiy tabriklarim va eng ezgu tilaklarimni izhor etishga ijozat bergaysiz.

O‘tgan yil oktyabr oyida Qozon shahrida bo‘lib o‘tgan BRIKS sammiti doirasidagi sermahsul va konstruktiv uchrashuvimizni iliqlik bilan eslayman. Hindiston O‘zbekiston bilan har tomonlama va o‘zaro manfaatli strategik sherikligimiz uchun mustahkam asos bo‘lib xizmat qilayotgan tarixiy va madaniy do‘stlik rishtalarini yuksak qadrlaydi. Yillar davomida hamkorligimiz barcha sohalarda, jumladan, mudofaa, savdo, iqtisodiyot, ta’lim, madaniyat va gumanitar aloqalarda kengayib bordi.

Mamlakatlarimiz o‘rtasidagi mustahkam sheriklik bundan buyon ham xalqlarimiz manfaati yo‘lida mustahkamlanib borishiga ishonaman.

Fursatdan foydalanib, Sizga mustahkam sog‘liq, muvaffaqiyatlar, O‘zbekiston xalqiga esa farovonlik va yanada ravnaq tilayman.

Janobi Oliylari, Sizga bo‘lgan yuksak ehtiromimni qabul qilgaysiz.

 

Narendra Modi,

Hindiston Respublikasi Bosh vaziri 

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

O‘zbekiston Respublikasi Mustaqilligi kuni munosabati bilan Siz, Janobi Oliylariga va do‘st o‘zbek xalqiga eng samimiy tabriklarimni, yurtingizga esa yanada taraqqiyot va farovonlik tilash menga katta mamnuniyat baxsh etadi.

Fursatdan foydalanib, Misr Arab Respublikasi O‘zbekiston bilan o‘rnatgan o‘ziga xos munosabatlarga katta ahamiyat qaratayotganini qayd etib, hamkorligimiz yo‘nalishlarini ikki do‘st xalqlarimiz manfaatlari yo‘lida turli sohalarda yanada mustahkamlashni davom ettirishga sodiqligimni ta’kidlayman.

Hurmatli Prezident Janobi Oliylari, Sizga sog‘liq-salomatlik va davlatchilik faoliyatingizda muvaffaqiyatlar, do‘st O‘zbekiston xalqiga esa bardavom farovonlik va ravnaq tilab qolaman.

Yuksak hurmat va ehtirom ila,

 

Abdulfattoh as-Sisi,

Misr Arab Respublikasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Siz, Janobi Oliylarini, do‘st va qardosh O‘zbekiston Respublikasi xalqini mamlakatingiz Mustaqillik kuni bilan chin qalbimdan tabriklayman.

Madaniy mushtaraklik, oliy martabali delegatsiyalar almashinuvi o‘zaro aloqalarimizni kengaytirish va davom ettirishda muhim rol o‘ynadi. Umid qilamanki, birgalikdagi sa’y-harakatlar natijasida biz o‘zaro manfaatlarga mos ravishda munosabatlarning tobora kengayib borayotganiga, mintaqaviy va xalqaro tinchlik hamda xavfsizlikni rivojlantirishga guvoh bo‘lamiz.

Alloh taolodan Janobi Oliylariga sog‘liq va muvaffaqiyatlar, O‘zbekiston Respublikasi xalqiga esa farovonlik va baxt-saodat tilayman.

 

Mas’ud Pezeshkiyon,

Eron Islom Respublikasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Janobi Oliylari!

Sizni va birodar O‘zbekiston Respublikasi xalqini qutlug‘ bayram – O‘zbekiston Respublikasi Mustaqilligi kuni bilan chin qalbimdan samimiy muborakbod etaman.

Pokiston va O‘zbekistonni azaldan mushtarak e’tiqod, tarix, madaniyat va merosga ega birodarlik rishtalari bog‘lab turadi. Ushbu chuqur aloqalar har ikki tomonning dono rahbarligi va qat’iy sadoqati tufayli yangicha tus olayotganini kuzatish biz uchun alohida mamnuniyat manbai hisoblanadi.

Yaqinda mamlakatlarimiz munosabatlari tarixiy bosqichga ko‘tarilib, muhim mexanizm – oliy darajadagi Strategik hamkorlik kengashi tuzildi. Ushbu yutuqdan kelib chiqib, ko‘p yillik do‘stligimizni o‘zaro manfaatli strategik va ko‘p qirrali sheriklik darajasiga ko‘tarishda Siz bilan yaqindan hamkorlik qilishga umid qilaman.

Fursatdan foydalanib, Sizga mustahkam sog‘liq, baxt-saodat va muvaffaqiyatlar, O‘zbekistondagi birodarlarimizga esa bardavom tinchlik, taraqqiyot va ravnaq tilayman.

Janobi Oliylari, Sizga bo‘lgan yuksak ehtiromimni qabul qilgaysiz.

 

Shahboz Sharif, 

Pokiston Islom Respublikasi Bosh vaziri

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Muhtaram Prezident janoblari!

Sizni va O‘zbekiston xalqini milliy bayram – O‘zbekiston Respublikasining Mustaqillik kuni bilan samimiy muborakbod etishga ijozat bergaysiz.

Joriy yil 24-iyul kuni bo‘lib o‘tgan telefon orqali muloqotimizda mamlakatlarimiz o‘rtasidagi munosabatlarni yanada rivojlantirish borasidagi intilishimiz qat’iy ekanini yana bir bor tasdiqlaganimizni mamnuniyat bilan ta’kidlayman.

Ishonchim komilki, bunday o‘zaro anglashuv, shuningdek, Koreya Respublikasi va O‘zbekiston Respublikasi o‘rtasida ko‘p yillar davomida shakllangan mustahkam ishonch tufayli hamkorligimizning “Alohida strategik sheriklik” maqomi yanada mustahkamlanadi. Faol almashinuvlar xalqlarimiz o‘rtasidagi do‘stlik rishtalarini yanada mustahkamlashga xizmat qilishiga aminman.

Kelgusi yilda Koreya Respublikasida o‘tkazilishi rejalashtirilgan “Koreya – Markaziy Osiyo” sammiti hamda boshqa xalqaro tadbirlar doirasida o‘zaro manfaatli va do‘stona hamkorligimizni yanada mustahkamlash bo‘yicha sermazmun va samarali muloqot o‘tkazish uchun Siz, Prezident janoblari bilan shaxsan uchrashish imkoniyatini intiqlik bilan kutmoqdaman.

O‘zbekiston Respublikasiga tinchlik va barqaror taraqqiyot, Sizga, muhtaram Prezident, mustahkam sog‘liq, O‘zbekiston xalqiga baxt-saodat va farovonlik tilayman.

Hurmat bilan,

 

Li Chje Myon, 

Koreya Respublikasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Hurmatli Prezident janoblari!

Yevropa Ittifoqi nomidan Sizga va O‘zbekiston xalqiga O‘zbekiston Respublikasining Mustaqillik kuni munosabati bilan eng samimiy tabriklarimni yo‘llamoqchiman.

Bu sana nafaqat mamlakatingiz suvereniteti bayrami, balki xalqingiz matonati va intilishlaridan dalolatdir. U O‘zbekiston erishgan siyosiy, iqtisodiy va ijtimoiy taraqqiyotni, shuningdek, Yevropa Ittifoqi va mamlakatingiz o‘rtasida o‘rnatilgan mustahkam do‘stona aloqalarni e’tirof etish imkonini beradi.

Bizning sherikligimiz, shubhasiz, yangi bosqichga ko‘tarildi, barcha sohalarda, shu jumladan Sizning yetakchiligingiz ostida sermahsul va ko‘p qirrali hamkorlik bilan ajralib turadi. Joriy yil aprel oyida Samarqandda “Yevropa Ittifoqi – Markaziy Osiyo” birinchi sammiti doirasida bo‘lib o‘tgan uchrashuvimiz, shuningdek, o‘zbek xalqining mehmondo‘stligini his etish baxtiga muyassar bo‘lganim haqida ajoyib xotiralar saqlanib qolgan.

Siz bilan 2025-yil 24-oktabr kuni Bryusselda bo‘lib o‘tadigan uchrashuvni intiqlik bilan kutaman, u yerda Yevropa Ittifoqi va O‘zbekiston o‘rtasida Kengaytirilgan sheriklik va hamkorlik to‘g‘risidagi bitimning imzolanishi munosabati bilan fikr almashishni davom ettirish imkoniga ega bo‘lamiz.

Fursatdan foydalanib, Sizga, Janobi Oliylari, yana bir bor yuksak ehtiromimni izhor etishga ijozat bergaysiz.

Samimiyat ila,

 

Antoniu Koshta,

Yevropa kengashi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Prezident janoblari!

O‘zbekiston Respublikasining mustaqillik kuni munosabati bilan Sizga va o‘zbek xalqiga samimiy tabriklarimni yo‘llayman.

Davlatlarimiz o‘rtasidagi munosabatlar mustahkam sheriklik xususiyatiga ega. O‘tgan yili ham ular rivojlanishda davom etganini ta’kidlashdan mamnunman. Germaniyaning Markaziy Osiyo davlatlari bilan strategik mintaqaviy sherikligi, shuningdek, imzolangan Migratsiya va harakatlanish sohasida hamkorlik to‘g‘risidagi bitim ikki tomonlama hamkorligimizni yanada chuqurlashtirish yo‘lida yangi yo‘nalishlarni belgilab berdi.

Rahbarligingizda amalga oshirilayotgan islohotlar siyosatida Sizga katta muvaffaqiyatlar tilayman va Germaniya bundan buyon ham ishonchli hamkor sifatida Sizni qo‘llab-quvvatlashiga ishontirib aytaman. Barqaror, farovon va demokratik O‘zbekiston butun mintaqa uchun muhim ahamiyatga ega.

Prezident janoblari, mening eng ezgu tilaklarimni qabul qilgaysiz, O‘zbekiston xalqiga esa erkinlik, xavfsizlik va farovonlikka asoslangan tinch kelajak tilayman.

 

Frank-Valter Shtaynmayer,

Germaniya Federativ Respublikasi Prezidenti

* * *

 

O‘zbekiston Respublikasi Prezidenti

Shavkat Mirziyoyev Janobi Oliylariga

 

Prezident janoblari!

Mustaqillik bayrami munosabati bilan shaxsan o‘z nomimdan va Italiya Respublikasi nomidan Sizni samimiy muborakbod etishga ijozat bergaysiz.

Mamlakatlarimiz o‘rtasidagi strategik hamkorlikni kengaytirish o‘zaro manfaatlarimizni yaqinlashtirishga xizmat qilmoqda. Ishonchim komilki, bu jarayon turli sohalarni qamrab olib, bo‘lib o‘tgan oliy darajadagi samarali uchrashuvlarda erishilgan natijalarga yangi sur’at bag‘ishlaydi va ko‘plab qo‘shma loyihalarda o‘z ifodasini topadi.

Toshkent va Rim o‘rtasidagi o‘zaro manfaatli ikki tomonlama muloqot mintaqaviy hamkorlik orqali ham yanada rivojlanmoqda. Bugungi kunda “Italiya – Markaziy Osiyo” formati tinchlik, barqarorlik va izchil taraqqiyotni ta’minlash uchun o‘ziga xos maydon bo‘lib xizmat qilmoqda.

Umid qilamanki, mamlakatingizning Yevropa Ittifoqi bilan tobora chuqurlashib borayotgan munosabatlari Birlashgan Millatlar Tashkiloti Nizomida mustahkamlangan tamoyillarga sodiqlik, xalqaro tartib me’yorlari va qoidalariga rioya qilish bilan birgalikda ushbu yuksak maqsadlarga erishishga olib keladi.

Fursatdan foydalanib, Sizga va do‘st O‘zbekiston xalqiga yana bir bor farovonlik va ravnaq tilayman.

 

Serjo Mattarella,

Italiya Respublikasi Prezidenti

* * *

 

Quyidagilar ham o‘z tabriklarini yo‘llagan:

Armaniston Respublikasi Bosh vaziri Nikol Pashinyan,

Saudiya Arabistoni Podshohi Salmon ibn Abdulaziz Ol Saud,

Saudiya Arabistoni Valiahdi, Bosh vaziri Muhammad ibn Salmon Ol Saud,

Pokiston Islom Respublikasi Prezidenti Asif Ali Zardariy,

Birlashgan Arab Amirliklari Prezidenti Shayx Muhammad bin Zoid Ol Nahayon,

Birlashgan Arab Amirliklari Vitse-prezidenti, Bosh vaziri, Dubay amirligi hokimi Shayx Muhammad bin Roshid Ol Maktum,

Birlashgan Arab Amirliklari Vitse-prezidenti, Bosh vaziri o‘rinbosari, Prezident Administratsiyasi rahbari Shayx Mansur bin Zoid Ol Nahayon,

Bolgariya Respublikasi Prezidenti Rumen Radev,

Irlandiya Respublikasi Prezidenti Maykl Xiggins,

Serbiya Respublikasi Prezidenti Aleksandr Vuchich,

Sloveniya Respublikasi Prezidenti Natasha Pirs Musar,

Slovakiya Respublikasi Prezidenti Peter Pellegrini,

Latviya Respublikasi Prezidenti Edgars Rinkevichs,

Chernogoriya Respublikasi Prezidenti Yakov Milatovich,

Chexiya Respublikasi Prezidenti Petr Pavel,

Shveysariya Konfederatsiyasi Prezidenti Karin Keller-Zutter,

Estoniya Respublikasi Prezidenti Alar Karis,

Gruziya Prezidenti Mixail Kavelashvili,

Bosniya va Gersegovina Prezidiumi Raisi Jelko Komshich,

Buyuk Britaniya va Shimoliy Irlandiya Birlashgan Qirolligi Qiroli Charlz III, 

Yaponiya Imperatori Naruxito,

Belgiyaliklar Qiroli Filipp,

Ispaniya Qiroli Filipp VI,

Marokash Podshohi Muhammad VI,

Kambodja Podshohi Norodom Siamoni,

Mo‘g‘uliston Prezidenti Uxnaagiyn Xurelsux,

Singapur Respublikasi Prezidenti Tarman Shanmugaratnam;

Vetnam Sotsialistik Respublikasi Prezidenti Liong Kiong,

Tailand Podshohligi Bosh vaziri vazifasini bajaruvchi Pxumtxam Vechayachay,

Falastin Davlati Prezidenti Mahmud Abbos,

Afg‘oniston Bosh vaziri Muhammad Xasan Ohund,

Shanxay hamkorlik tashkiloti bosh kotibi Nurlanbek Yermekbayev,

Turkiy davlatlar tashkiloti bosh kotibi Kubanichbek Omuraliyev,

Mustaqil Davlatlar Hamdo‘stligi bosh kotibi Sergey Lebedev,

Iqtisodiy hamkorlik tashkiloti bosh kotibi Asad Xon,

Islom hamkorlik tashkiloti bosh kotibi Husayn Ibroxim Toha,

Islom dunyosi ta’lim, fan va madaniyat tashkiloti bosh direktori Salim al-Malik,

BMT Oziq-ovqat va qishloq xo‘jaligi tashkiloti bosh direktori Syuy Dun’yuy.

Qutlovlar kelishda davom etmoqda.

• 
• 
•