23.06.2017

Tez kunda Qo‘qon, Marg‘ilon va Andijon shaharlari o‘rtasida elektrichka qatnay boshlaydi. Prezidentimiz Shavkat Mirziyoyevning Farg‘ona mexanika zavodiga tashrifi chog‘ida shu haqda ma’lum qilindi. 

Davlatimiz rahbari tashabbusi bilan mamlakatimiz temir yo‘l tarmog‘ini modernizatsiya qilish, aholiga qulay, arzon va xavfsiz transport xizmati ko‘rsatish yo‘lida izchil ishlar amalga oshirilmoqda. Farg‘ona vodiysining yirik shaharlari o‘rtasida elektrichka harakati yo‘lga qo‘yilayotgani bu boradagi muhim qadamlardan bo‘ladi. 

“O‘zbekiston temir yo‘llari” aksiyadorlik jamiyati tomonidan ushbu yo‘nalishlar uchun 5 elektrichka modernizatsiya qilindi. Natijada transport vositalarining tashqi va ichki qiyofasi butunlay o‘zgargan. Vagonlarga konditsioner, zamonaviy o‘rindiqlar o‘rnatilgan. Xorijdan yana 10 elektropoyezd olib keltirish rejalashtirilgan. Har bir elektrichka 6 vagondan iborat. 

Joriy yilda Farg‘onadan Marg‘ilongacha bo‘lgan temir yo‘lni elektrlashtirish ishlari yakunlanadi. 

Prezidentimiz mazkur turdagi temir yo‘l transport qatnovining yo‘lga qo‘yilishi Farg‘ona vodiysi aholisining turmush darajasi va sifatini oshirishda muhim ahamiyat kasb etishini ta’kidladi. 

Ilgari Farg‘ona vodiysida elektropoyezd qatnaydi desa, birov ishonmasdi. Endi Qo‘qondan Andijonga bir soatda yetib borish mumkin. Bu ham xalqimizning uzog‘ini yaqin qilish borasidagi, odamlar manfaatini ko‘zlab amalga oshirilayotgan islohotlarimiz samarasidir, dedi Shavkat Mirziyoyev. 

Bu boradagi ishlarni izchil davom ettirish, Farg‘ona shahar vokzali binosi qurilishini nihoyasiga yetkazish yuzasidan mutasaddilarga tegishli topshiriqlar berildi.

• 
• 
•