22.06.2017

Mamlakatimizda madaniyat va san’atni yanada rivojlantirish, sohaning moddiy-texnik bazasini zamon talablari asosida mustahkamlash orqali aholi, ayniqsa, yoshlar ma’naviyatini yuksaltirishga ustuvor ahamiyat qaratilmoqda. Prezidentimizning joriy yil 31-maydagi “Madaniyat va san’at sohasini yanada rivojlantirish va takomillashtirishga doir chora-tadbirlar to‘g‘risida”gi qarori bu boradagi ishlarni yangi bosqichda davom ettirishda muhim dasturilamal bo‘layotir. 

Yurtimizning barcha hududlarida tarixiy obidalar ta’mirlanmoqda, yangi madaniyat va ma’naviyat maskanlari bunyod etilib, mavjudlari rekonstruksiya qilinmoqda.  

Qo‘qon shahar teatri 1987-yilda qurilgan. Teatr binosi, jumladan, 750 tomoshabinga mo‘ljallangan zal zamonaviy ta’mirlangan. 

Prezidentimiz ijodkorlar bilan muloqotda teatrning xalq orasidagi obro‘yi va nufuzini yanada oshirish bo‘yicha o‘z fikr-mulohazalarini bildirdi. 

Teatrni haqiqiy ma’naviyat o‘chog‘iga aylantirish uchun avvalo yaxshi asarlar kerak, dedi davlatimiz rahbari. Buning uchun bu yerda taniqli san’at namoyondalari, dramaturglar bilan uchrashuvlar tashkil etib,  ijodiy muhit yaratish zarur. 

Ijodkorlarni qo‘llab-quvvatlash, teatrning moddiy-texnik bazasini mustahkamlash bo‘yicha ko‘rsatmalar berildi. Ijodiy jamoani grim va postijyor mahsulotlari, liboslar, teatrni sahna dekoratsiyalari va konstruksiyalari, parda va boshqa buyumlar bilan ta’minlash zarurligi ta’kidlandi. Aktyor va rejissyorlarning malakasini oshirish, yosh mutaxassislar tayyorlash masalalariga alohida e’tibor qaratildi. 

• 
• 
•