22.06.2017

22-iyun kuni Marg‘ilondan Qo‘qonga ilk bor elektropoyezd qatnay boshladi. Davlatimiz rahbari Qo‘qonga ushbu poyezdda keldi.  

Qo‘qon shahridagi “Shaffof metan sanoat” mas’uliyati cheklangan jamiyatida iqtisodiy loyihalar bilan tanishdi. 

Xalqimiz farovonligi yuksalgani sari mamlakatimizda transport vositalari ko‘payib bormoqda. Ularning yoqilg‘iga bo‘lgan ehtiyojini ta’minlash maqsadida siqilgan va suyultirilgan gaz ballonlar ishlab chiqarish kengaytirilmoqda. 

“Shaffof metan sanoat” MChJ tomonidan Qo‘qon shahrida shu yo‘nalishdagi zamonaviy korxona tashkil etish rejalashtirilgan. Buning uchun eski “Qo‘qonmash” zavodining bo‘sh turgan binolarida zamonaviy texnologiya o‘rnatiladi. Yiliga 100 ming dona gaz balloni ishlab chiqarish va avtotransport vositalariga o‘rnatish yo‘lga qo‘yiladi. Korxonada 30 ish o‘rni yaratiladi. 

Davlatimiz rahbari ushbu mahsulotlarga bo‘lgan talab bilan qiziqdi. Gaz bilan yuradigan transport vositalari ko‘paysa, benzin va dizel yoqilg‘isiga talab kamayadi. Natijada sohadagi xizmatlar arzonlashadi, imkoniyatlar kengayadi, dedi Prezidentimiz. 

Mahsulot tannarxini arzonlashtirish, ishlab chiqarishni ikki barobar oshirish, sohaga ixtisoslashgan mutaxassislar tayyorlash bo‘yicha ko‘rsatmalar berildi. 

Qo‘qon shahrida hunarmandlikni va turizmni rivojlantirish borasida ham qator loyihalar belgilangan. Jumladan, hunarmandlik va zargarlik markazlari tashkil etish, zamonaviy mehmonxona qurish rejalashtirilgan. Ular qator soliq imtiyozlariga ega bo‘ladi, aholi bandligini ta’minlash, farovonligini oshirishda muhim ahamiyat kasb etadi. 

Shaharda amalga oshirilishi rejalashtirilgan yana bir loyiha – Wi-Fi tarmog‘ini barpo etish loyihasi aholi va sayyohlarga qo‘shimcha qulaylik yaratadi. 

Loyihalashtirilgan tibbiy xizmat va statsionar davolash markazi inson manfaatlarini ta’minlashga qaratilgan. Bu yerda AQShning “Jeneral elektrik” kompaniyasidan zamonaviy tibbiy jihozlar o‘rnatiladi. Markaz yiliga 25 ming 500 kishini davolash, 500 jarrohlik amaliyoti o‘tkazish imkoniyatiga ega bo‘ladi. 

Prezidentimiz aholi salomatligi bilan bog‘liq bu majmua qurilishini tezlashtirish zarurligini ta’kidladi. 

Shavkat Mirziyoyev “Imano grupp” korxonasi negizida poliuretan qoplamali tayyor charm ishlab chiqarish investitsiya loyihasi bilan tanishdi. Loyiha amalga oshirilgach, 250 ish o‘rni tashkil etish imkoniyati yaratiladi. 

Mavjud imkoniyatlardan yetarlicha foydalanmayapmiz, dedi davlatimiz rahbari. Tizimdagi korxonalarni barqaror xomashyo bilan ta’minlash, bunga aholini ham jalb etish zarur. Xom terini yig‘ish, sifatli tayyorlash va qayta ishlovchilarga yetkazib berishga ixtisoslashgan korxonalar tashkil etish kerak. 

Prezidentimizning 2017-yil 12-yanvardagi «Urgut», «G‘ijduvon», «Qo‘qon» va «Hazorasp» erkin iqtisodiy zonalarini tashkil etish to‘g‘risida»gi farmoniga muvofiq, Qo‘qonda erkin iqtisodiy zona barpo qilinmoqda. Ushbu hududda amalga oshirilishi rejalashtirilgan loyihalar haqida ma’lumot berildi. Rejaga muvofiq, bu yerda to‘qimachilik, oziq-ovqat sanoati, mashinasozlik, elektrotexnika, farmatsevtika, mebelsozlik, poligrafiya, charm-poyabzal va qurilish materiallari ishlab chiqarish yo‘lga qo‘yiladi. 

Shu yerda tijorat banklari tomonidan amalga oshiriladigan, chiqindilarni kompleks boshqarish klasterini tashkil etishga qaratilgan loyihalar ham namoyish etildi. 

• 
• 
•