09.01.2019
Prezident Shavkat Mirziyoyev 8-yanvar kuni investitsiya sohasiga bagʻishlangan videoselektorda xorijiy davlatlarning yetakchi universitetlari filiallarini ochish oliy taʼlim sohasiga kiritilgan yaxshi investitsiya ekanini, bilimli, zamonaviy mutaxassislar mamlakatga katta manfaat keltirishini taʼkidladi.
Oʻzbekistonda 91 ta oliy taʼlim muassasasi mavjud, shundan 11 tasi xorijiy oliy taʼlim muassasalari va filiallaridir. Ayni vaqtda yurtimizda Rossiya Federatsiyasi, Buyuk Britaniya, Janubiy Koreya, Singapur, Italiya kabi davlatlarning oliy taʼlim muassasalari va ularning filiallari faoliyat koʻrsatmoqda.
Oʻzbekiston Respublikasi Prezidentining 2019-yil 7-yanvardagi qaroriga muvofiq ularning safiga Toshkent shahrida tashkil etiladigan yangi Hindistonning Amiti universiteti ham qoʻshildi. Ushbu universitetda axborot-kommunikatsiya texnologiyalari mutaxassislari tayyorlanadi, ular dasturiy taʼminot ishlab chiqish, axborot tizimlari va kompyuter tarmoqlarini boshqarish boʻyicha xalqaro standartlar darajasida tahsil olishadi.
Ma'lumotlardan foydalanilganda
www.president.uz ga havola ko‘rsatilishi shart
© 2025 O‘zbekiston Respublikasi Prezidentining rasmiy veb-sayti
Barcha huquqlar himoyalangan
Diqqat! Agar siz matnda xatoliklarni aniqlasangiz, ularni belgilab, ma`muriyatni xabardor qilish uchun Ctrl+Enter tugmalarini bosing
