12.02.2026

Президент Шавкат Мирзиёев 12 февраль куни Андижон вилоятини ижтимоий-иқтисодий ривожлантириш бўйича олиб борилаётган ишлар ва 2026 йил учун устувор вазифалар юзасидан йиғилиш ўтказди.

Йиғилиш аввалида қайд этилганидек, Андижон – аҳолиси энг зич жойлашган ҳудуд. Вилоятда 3,5 миллиондан ортиқ аҳоли истиқомат қилади, ҳар йили 80 мингга яқин туғилиш қайд этилмоқда.

Ер ресурслари чекланган шароитда ҳар бир гектар ер, ҳар бир лойиҳа ҳамда ҳар бир инвестиция юқори қўшилган қиймат ва барқарор иш ўрни яратиши шартлиги таъкидланди. Бу вилоят раҳбарияти олдидаги энг асосий вазифа экани кўрсатиб ўтилди.

2025 йил якунларига кўра, ялпи ҳудудий маҳсулот 107,7 триллион сўмни ташкил этиб, 6,8 фоизга ошди. Саноат маҳсулотларини ишлаб чиқаришда 7,2 фоиз, хизматлар ҳажмида 15,1 фоиз, қишлоқ хўжалигида 4,7 фоиз ўсиш қайд этилди.

Жорий йилда иқтисодиёт ва саноатни 8 фоизга, хизматларни 16,3 фоизга, қишлоқ хўжалигини 5,9 фоизга ошириш мақсад қилинган. Хорижий инвестицияларни 2025 йилдаги 2,5 миллиард доллардан 2026 йилда 3,5 миллиард долларга, экспортни 1,3 миллиард доллардан 1,5 миллиард долларга етказиш режалаштирилган.

2025 йилда 383 минг аҳолининг бандлиги таъминланган бўлса, 2026 йилда 489,5 минг аҳолининг бандлигини таъминлаш, ишсизликни 3,6 фоизга, камбағалликни 2,4 фоизга тушириш муҳимлиги таъкидланди.

Асака, Олтинкўл, Хўжаобод, Шаҳрихон туманлари ҳамда Андижон шаҳрини ишсизлик ва камбағалликдан холи ҳудудларга айлантириш вазифаси қўйилди. “Оғир” тоифадаги Бўстон, Пахтаобод ва Улуғнор туманларида камбағалликни камида икки баробар қисқартириш белгиланди.

Жорий йилда вилоятда 798 миллион долларлик лойиҳаларни ишга тушириш режалаштирилгани таъкидланди.

Жумладан, Асака, Булоқбоши ва Шаҳрихон туманларида чарм-пойабзал, қурилиш материаллари ҳамда дастгоҳлар ишлаб чиқаришга ихтисослашган 3 та микросаноат маркази ташкил этилади. 110 та қишлоқ ҳамда 26 та чегараолди ва олис маҳаллаларда қишлоқ хўжалиги маҳсулотларини қайта ишлаш, кичик совиткичли омборлар ташкил қилиш ва микросаноат лойиҳалари амалга оширилади.

Андижон туманидаги “Ипак йўли” эркин иқтисодий зонасида 100 гектардан ортиқ ер майдони бўш турибди. Ер ресурслари чекланган шароитда тайёр инфратузилмаси бор майдонларда юқори қўшилган қийматли лойиҳаларни жойлаштириш, минглаб иш ўринларини яратиш имкониятидан тўлиқ фойдаланиш зарурлиги кўрсатиб ўтилди.

Вилоятда қишлоқ хўжалигини ривожлантиришга алоҳида эътибор қаратилди.

Жорий йилда пахтачиликда ҳосилдорликни ошириш мақсадида хорижий навлар жойлаштириладиган ва илғор “76х10” схемаси асосида экиладиган пахта майдонларини кенгайтириш, 472 дона янги техника харид қилиш режалаштирилган. 2 минг гектар кам самарали эски боғлар интенсив боғларга айлантирилади, 6,8 минг гектар ер фойдаланишга қайта киритилади.

Янги тажриба сифатида Олтинкўлда гулчилик, Избосканда кўчатчилик, Асакада иссиқхоначилик, Қўрғонтепада сабзавотчилик, Булоқбошида узумчилик бўйича томорқа мактаблари ташкил этилади.

2025 йилда вилоятга 460 минг хорижий ва 1,8 миллион маҳаллий турист келган. Жорий йилда хорижий туристлар сонини 700 мингга, маҳаллий сайёҳларни эса 2,5 миллионга етказиш мақсад қилинган.

Шу мақсадда Булоқбошидаги “Ширмонбулоқ”, Хўжаободдаги “Имом ота” ва Хонободдаги туризм марказларини ривожлантириш учун алоҳида дирекция очилади. Туман ва шаҳар марказларидаги 91 та маҳаллани боғловчи гавжум кўчаларда савдо, дам олиш ва кўнгилочар масканлар барпо этилади.

Андижонда уй-жой масаласи бошқа ҳудудларга нисбатан анча долзарб. Жорий йилда вилоятдаги “Янги Ўзбекистон” массивларида 54 та, бошқа ҳудудларда эса 158 та кўп қаватли уйлар қурилиши кутилмоқда.

“Қурилишга тайёр ер” тизимини жорий этиш орқали лойиҳаларни бошлаш муддатини 120 кундан 30 кунгача қисқартириш мумкинлиги кўрсатиб ўтилди. Жалақудуқда ушбу янги тизим асосида замонавий уй-жойлар қуриш бўйича тажриба бошланади.

Вилоятда 11 та олий таълим муассасаси фаолият юритмоқда, 94 мингдан ортиқ талаба таҳсил олмоқда, 56 та техникумда 46 минг нафар ўқувчи касбларга ўргатилмоқда. Олийгоҳлардаги илмий салоҳиятни ошириш, дуал таълим қамровини кенгайтириш чоралари белгилаб олинди.

Тиббиёт техникумларига тил ўргатиш бўйича илғор хусусий таълим ташкилотларини жалб қилиб, йилига 4 мингдан зиёд ёшларнинг Европа давлатларига ишлашга боришига кўмаклашиш ташаббуси қўллаб-қувватланди.

Ёшларни қўллаб-қувватлаш мақсадида Ижтимоий реестрга кирмаган оилаларнинг иқтидорли фарзандларига ҳам спорт, маданият ва санъат соҳасидаги ташаббуслари учун “Ёшлар дафтари” жамғармасидан 41 миллион сўмгача субсидия бериш таклиф қилинди. Президентимиз ушбу тартибни Андижон вилоятидан бошлашни топширди.

Давлатимиз раҳбари йиғилиш якунида белгиланган вазифалар ижроси Андижон аҳолиси ҳаётида аниқ ва сезиларли натижа бериши шартлигини таъкидлаб, мутасаддиларга тегишли топшириқлар берди.