27.07.2017
Ўзбекистон Республикаси Президенти Шавкат Мирзиёев Рам Натҳ Ковиндни Ҳиндистон Президенти этиб сайлангани билан табриклади.
“Сизнинг ушбу ғоят масъулиятли лавозимга сайланишингиз, авваламбор, Ҳиндистон халқининг Сизга бўлган катта ишончи ифодаси, кўп йиллик сиёсий фаолиятингиз, бой ҳаётий тажрибангизга берилган холис ва ҳаққоний баҳодир”, дея қайд этди давлатимиз раҳбари.
Мактубда ўзаро манфаатларга жавоб берадиган барча йўналишларда узоқ муддатли стратегик алоқаларни изчил ва босқичма-босқич ривожлантириб боришдан Ўзбекистон томони манфаатдор эканлиги таъкидланди.
“Даврлар ва ҳаёт синовидан ўтган Ўзбекистон ва Ҳиндистон ўртасидаги дўстлик ришталари халқларимизнинг кўп асрлик яқин муносабатлари асосида бугунги кунда муваффақиятли ривожланиб ва мустаҳкамланиб бораётганини алоҳида таъкидлашни истардим”, – дейилади Ўзбекистон Президентининг мактубида.
Шавкат Мирзиёев Рам Натҳ Ковиндга мустаҳкам соғлик ва масъулиятли фаолиятида улкан зафарлар, дўст ҳинд халқига бардавом тинчлик, тараққиёт ва фаровонлик тилади.
Маълумотлардан фойдаланилганда www.president.uz га ҳавола кўрсатилиши шарт
© 2025 Ўзбекистон Республикаси Президентининг расмий веб-сайти
Барча ҳуқуқлар ҳимояланган
Диққат! Агар сиз матнда хатоликларни аниқласангиз, уларни белгилаб, маъмуриятни хабардор қилиш учун Ctrl+Enter тугмаларини босинг
